COMO CADA MARTES O ASCENSO DE CONTAXIOS NON É TAN ALTO COMO OUTROS DÍAS

Coronavirus: 203 positivos novos en Galicia e 3.742 casos activos Só 12 contaxios máis que o martes pasado, con Santiago e Lugo como zonas de maior crecemento. Xa hai 160 hospitalizados en Galicia. Hai uns minutos a Xunta de Galicia comunicou 203 novos positivos por coronavirus na comunidade, a menor cifra dos últimos días. Os martes son o día no que se comunican o menor número de contaxios nas últimas semanas, pero hoxe o número é similar ao do mesmo día da semana pasada, cando se rexistraron 191. Soamente crece en 12, un 6%. Estes 203 novos casos de COVID-19, restándolles o falecemento que houbo nas últimas 24 horas e as novas 100 altas, fan que o número de casos activos ascenda de 3.640 a 3.742. Galicia continúa nos niveis de finais de abril de infectados, mentres que o número de hospitalizados ascende de 141 a 160, e xa está ao mesmo nivel que o 13 de maio. O total de casos de SARS- CoV-2 na comunidade desde o inicio da pandemia suma 17.157. Lugo e Santiago seguen sumando casos activos En canto ao resto de Galicia, as áreas sanitarias de Santiago de Compostela e Lugo continúan xerando preocupación e volven ser as que máis crecen. A área de Lugo ascende de 730 a 759 casos (+29), mentres que a de Santiago pasa de 582 a 607 (+25). O resto de áreas galegas tamén crecen e séguelles Ourense con 343 casos (+3), Vigo con 253 (+16), Pontevedra con 233 (+7) e Ferrol con 144 casos (+11). Nas últimas 24 horas faleceu unha persoa máis, unha muller de 96 anos no HULA de Lugo, e o total de mortes desde o inicio da pandemia chega a 644, 25 delas nesta segunda onda. En Galicia hai un total de 160 hospitalizados (19 máis que onte), divididos en 143 en planta (+19) e 17 en UCI (sen cambios). O total de probas PCR realizadas pola Xunta de Galicia é de 339.206, delas 3.652 correspondentes ás últimas 24 horas. Esta semana producíronse xa 477 contaxios de coronavirus en Galicia sumando os casos de luns e martes, un crecemento do 17,8% respecto a os 405 positivos do luns e martes da semana pasada. Aínda que seguen aumentando os contaxios semana a semana e tanto o luns como o martes foron os peores días da nova normalidade, a porcentaxe de crecemento é moi inferior ao de semanas anteriores.