AS ALTAS FAN DIMINUIR O TOTAL DE ENFERMOS EN GALICIA

Galicia é, despois de Asturias, a segunda comunidade en España con menor incidencia do coronavirus. O último balance sanitario do Sergas recolle por primeira vez en semanas que o número de contaxios diarios, que adoitaba superar os 200, comeza a frearse. Entre o sábado e o domingo a última hora da noite, Sanidade contabilizou 188 novos casos. O descenso de novos positivos unido ás recuperacións fan que a Comunidade logre rebaixar tamén o número de persoas que atravesan o Covid-19 nestes momentos. A cifra queda en 4.304, 46 menos que onte.

Con todo, a presión hospitalaria segue á alza. Xa hai 32 persoas na UCI, tres máis que o día anterior e tamén sobe o número de ingresados en planta que alcanza os 211 (catro máis). A cifra de mortos tamén se incrementa e xa son 718 falecidos, tres máis que a xornada previa. Por áreas sanitarias, A Coruña segue como a máis afectada, pero o número de casos activos descende. Hai 1.148 persoas que atravesan o coronavirus, 30 menos que o día previo. En Lugo tamén descenden os casos activos ata chegar aos 689 (36 menos); en Ourense son 541 (14 máis); en Pontevedra 667 (9 máis); en Santiago 625 (12 menos) e en Ferrol hai 177 (7 menos).

Nas últimas 24 horas sumáronse ao parte tres falecementos relacionados coa COVID-19, os de dous usuarios de residencias --a Orpea de Culleredo e a DomusVi Lugo de Outeiro de Rei-- e o dunha muller ingresada no Hospital de Ourense, co que xa son 718 os vinculados á pandemia na comunidade.