UNHA NOVA VÍTIMA DE COVID-19 E CASE 100 CASOS MÁIS EN GALICIA

Unha muller de 91 anos que estaba ingresada no Complexo Hospitalario Universitario de Ourense ( CHUO) e que fora diagnosticada por coronavirus faleceu na tarde deste venres, segundo informou a Consellería de Sanidade. Drástico aumento dos casos de coronavirus en Galicia. A cifra aumentou en case cen nas últimas 24 horas, segundo informou este sábado a Consellería de Sanidade. Concretamente, pasou de 444 onte a 533 hoxe, un salto de 89 novos pacientes (112 se sumamos as altas). O incremento máis numeroso prodúcese na Coruña, onde xa son 246, 69 máis que onte. Lugo tamén remonta, ao pasar de 72 a 79, do mesmo xeito que Ourense (de 34 á 37), Pontevedra (de 43 a 44), Vigo (de 78 a 81), Santiago (de 35 a 40) e Ferrol (de 5 a 6). Polo de agora, en Galicia hai un total de 11.403 persoas curadas (23) máis que onte. Por outra banda aumenta igualmente o número de pacientes ingresados en UCI (de dúas a tres), o de hospitalizados (de 21 a 25) e os que pasan a enfermidade en domicilio, que agora mesmo sitúanse en 505. Ademais, unha persoa faleceu a última hora de onte, a primeira en dous meses, elevando o total de falecidos ata o de agora a 620. En canto ás residencias, o número de afectados sitúase en tres: dous empregados e un usuario. Para frear o avance do virus na área sanitaria da Coruña e Cee, a Xunta anunciou onte a suspensión do lecer nocturno na comarca que conforma a cidade herculina e outros oito municipios contiguos e o peche das residencias de maiores e os centros de día en toda a demarcación.