OUTRA XORNADA DE AUMENTO NOTABLE DO NÚMERO DE ENFERMOS EN GALICIA

O coronavirus non dá tregua en Galicia. Segue o ritmo sostido de incremento de casos que marcou a tónica nas últimas xornadas. De acordo co último balance difundido pola Consellería de Sanidade, nestes momentos rexístranse na Comunidade un total de 740 casos activos. Son 70 (78 contando as altas) máis nas últimas 24 horas, en comparación cos 670 da véspera. Por áreas sanitarias, A Coruña segue absorbendo a maior parte deste incremento, ao pasar de 371 a 406: eses 35 casos novos representan exactamente a metade dos que se detectaron en Galicia durante o último día de rastrexo do Covid-19. En canto ao resto de áreas, Lugo rexistra 80 casos activos (+5); Ourense, 49 (+3); Pontevedra, 45 (+1); Vigo, 108 (+23); Santiago, 41 (+1); e Ferrol, 11 (+2). Hai aumentos en todas as áreas, pero as diferenzas son substanciais. Son leves na maioría, salvo na Coruña, que se destaca, e en Vigo, afectada tamén por múltiples rebrotes. Atendendo á situación asistencial, hai 2 pacientes en UCI, igual que a véspera, pero son xa 31 os hospitalizados, seis máis que no balance emitido o luns. O groso de casos, de calquera forma, segue afrontando a enfermidade nos seus domicilios: 707. Polo que se refire aos curados, hai xa 11.454 persoas que superaron o coronavirus, 8 máis en 24 horas. Non hai novidades na rede de residencias sociosanitarias galegas. Segundo informa a Consellería de Política Social, mantéñense tres usuarios afectados, os tres en Matogrande (A Coruña), e dous positivos de traballadores, en Xove (Mariña lucense) e Paradela (tamén na provincia de Lugo). Rexistráronse polo momento 621 falecementos. Os dous últimos, correspondentes a persoas de avanzada idade. O número de PCR realizadas ascende xa a 266.893.

PONTEVEDRA-SALNÉS

A área sanitaria de Pontevedra e O Salnés rexistrou na última xornada tres novos positivos por coronavirus. Pero dúas altas de pacientesfan que o número total de casos activos ascenda só a 45, un máis que o luns. 

Segundo o balance oficial realizado polo Servizo Galego de Saúde, deses 45 casos activos, 44 evolucionan no seu domicilio e o outro está hospitalizado. en planta do  Complexo Hospitalario Universitario de Pontevedra. 

Desde o inicio do plan de continxencia da Covid-19, curáronse 929 pacientes, dous nas últimas 24 horas, e faleceron por este virus na área sanitaria 16 pacientes.