GALICIA NON BAIXA DOS 300 NOVOS ENFERMOS DIARIOS E SUMA MÁIS FALECIDOS

Os datos de Sanidade indican que os mortos son xa 640 na Comunidade, dúas máis dos que constaban no parte do sábado, debido a que nas últimas horas notificáronse dous falecementos: o dunha muller de 83 anos que era usuaria da residencia do Incio (Lugo), pero morreu no Hospital Lucus Augusti, e o dun home de 74 anos falecido no hospital da Coruña.
O parte do día 8 de agosto, rompeu a tregua en canto a defuncións, que non sumara ningunha vítima desde o 11 de xuño. E os falecementos fóronse sucedendo. Onte chegaron a 640, o que conleva que 21 persoas perderon a vida nas tres últimas semanas. Isto é: unha defunción ao día, de media.

Segundo o último balance da Xunta, Galicia continúa incorporando casos activos de covid-19, coa suma de 190 máis nas últimas vinte e catro horas -71 deles na área sanitaria de Lugo-; co cal o número total de afectados é hoxe de 3.484. Nas residencias de maiores, o número de afectados entre usuarios é de 139, 38 máis que o sábado e a maioría concentrados no xeriátrico do Incio (Lugo); mentres que o número traballadores destes centros contaxiados é de 51, catro máis respecto a a xornada previa. Sumadas as altas, 118, e as dúas últimas defuncións, fan un total de 310 novos enfermos. Entre os infectados totais, 17 persoas -dúas máis- se atopan ingresadas nas UCI e outras 119 en unidades convencionais de hospitalización; mentres que o resto (3.348) permanecen nos seus domicilios. Por áreas sanitarias, a máis castigada segue sendo a da Coruña, onde se rexistraron 1.382 casos, seis máis. Tras A Coruña, a maior afectación dáse na área sanitaria de Lugo, con 675 casos, 71 máis; á que seguen Santiago, que experimentou nos últimos días un repunte de casos e conta con 540 (67 máis); Ourense, con 324 (24 máis); Vigo, con 214 (cinco máis); Pontevedra con 218 (trece máis) e por último Ferrol, con 131 (catro máis). As autoridades sanitarias informan no comunicado remitido á prensa de que xa se curaron 12.556 persoas (118 máis). O número probas PCR acumulado elévase a 331.803.