DISPÁRASE O BROTE DA MARIÑA E FAI QUE AUMENTE O XERAL GALEGO

A Consellería de Sanidade cifrou este venres en 59 os contaxios activos enmarcados neste foco, 12 máis que onte, data na que xa se produciu ademais un salto cuantitativo similar respecto ao día anterior. Do mesmo xeito que onte, só dous dos 59 pacientes atópanse hospitalizados, mentres que a gran maioría permanecen asintomáticos. O último dato achegado polo departamento autonómico cifraba en máis de 500 os contactos que gardan corentena nos seus domicilios e en 900 as probas PCR realizadas ata o de agora. Para tratar de atallar o foco canto antes, representantes do equipo directivo da Consellería e da área Sanitaria de Lugo, Monforte de Lemos e A Mariña mantiveron na mañá deste venres unha reunión con alcaldes da comarca co fin de coordinar as accións necesarias que o posibiliten. Para iso, os representantes pediron aos rexedores que fagan uso das súas competencias para que se cumpran as medidas de hixiene e seguridade recomendadas, como o distanciamento social, a limitación de aforo nos locais e o uso da máscara. O total de contaxios que acumula a área sanitaria de Lugo sitúase con esta nova suma en 77. En canto ao resto de demarcacións, 63 pacientes atópanse na Coruña, 17 na de Ourense, 5 na de Pontevedra, 122 na de Vigo, 24 na de Santiago e 10 na de Ferrol. Catro dos 318 casos activos actualmente en toda Galicia (catro máis que onte) atópanse en unidades de hospitalización. O resto, 314, gardan corentena nos seus domicilios. As altas emitidas ata o de agora elévanse a 10.665 e tampouco se rexistran cambios nas residencias de maiores, onde só queda un traballador contaxiado.

Nestes momentos a zona sanitaria Pontevedra-O Salnés ten 5 casos Covid, con pacientes que evolucionan nos seus domicilios. A cifra máis baixa desde o inicio do Estado de Alarma.

Desde o inicio do plan de continxencia curáronse 898 pacientes, sumando xa o que se curaba nas últimas horas, e faleceron 16 pacientes nos centros hospitalarios de Pontevedra.