POUCAS VARIACIÓNS RESPECTO A ONTE NOS CASOS DE CORONAVIRUS

A Consellería de Sanidade cifrou os positivos baixo tratamento en 351 (oito menos que onte) e detallou que oito deles están en unidades de hospitalización (un máis) e o resto, 343, nos seus domicilios, seguindo sen haber por quinto día consecutivo ningunha persoa atendida en UCI. En canto á distribución por áreas sanitarias, os pacientes están repartidos da seguinte maneira: 109 concéntranse na área da Coruña, 21 na de Lugo, 27 na de Ourense, 8 na de Pontevedra, 140 na de Vigo, 34 na de Santiago e 12 na de Ferrol. As altas suman un total de 10.486 e non hai variacións no número de falecidos (619) nin na situación en residencias (sete usuarios contaxiados e outros sete empregados).

Segundo os datos ofrecidos deste domingo pola Consellería de Sanidade, a área pontevedresa mantén 8 casos activos de Covid-19 tras non rexistrarse nin altas  nin novos contaxios no último parte oficial.

Todas as persoas afectadas evolucionan nos seus domicilios, polo que os hospitais da comarca suman un día máis sen ter que atender a pacientes con positivo activo.

Ao non contabilizarse altas, o número de curados desde o inicio da pandemia mantense en 891, do mesmo xeito que a cifra de falecementos asociados ao Covid que desde hai semanas é de 16.