MENOS MORTOS NO DÍA DE HOXE RESPECTO A ONTE. 206 NO TOTAL

Son xa 15 as vítimas mortais que deixa esta xornada segundo o reconto do Sergas, con seis novos óbitos comunicados desde o servizo galego de saúde. Trátase de tres mulleres de 86, 78 e 96 anos que estaban ingresadas no CHUAC coruñés; unha muller de 55 ingresada no CHUO de Ourense e dous homes de 94 e 86 ingresados en Povisa. Todos con patoloxías previas.

Na actualización da mañán dábase conta do falecemento de 9 enfermos. Un home e unha muller de 64 e 66 anos no CHUF de Ferrol; unha muller e un home de 84 e 94 no CHOU de Ourense; unha muller de 82 no Hospital do Barco de Valdeorras; un home e unha muller de 69 e 93 no CHUAC de Santiago; e un home de 78 no Álvaro Cunqueiro de Vigo, todos con patoloxías previas. Súmase un home de 90, no CHUAC, sen patoloxías de base. Todos, por tanto, persoas con idades comprendidas entre os 64 e 93 anos, e na súa inmensa maioría con problemas de saúde previos.

A estes quince falecementos hai que sumar os decesos en residencias dos que dá conta no seu último balance a Consellería de Política Social. Nas residencias da terceira idade faleceron outros cinco usuarios: un na residencia Remanso Claudina Somoza (A Coruña), dúas persoas na nosa Señora da Esperanza (Ourense) e outras dúas en Dosmuvi Barreiro, en Vigo. En total, hai 554 maiores infectados, ademais de 194 traballadores. En centros de discapacidade: 46 usuarios e 38 traballadores.

Sumando os 174 falecementos en hospitais e os 32 en residencias, un total de 206 persoas perderon a vida a causa do Covid-19 en Galicia. A maioría, anciáns -a media de idade, o venres, superaba os 80 anos-, e unha porcentaxe tamén moi alto con patoloxías previas.