MELLOR DÍA EN CANTO A FALECEMENTOS DESDE HAI UN MES

No día de hoxe faleceron 6 persoas con coronavirus, a cifra máis baixa desde hai un mes, exactamente o 25 de marzo.

A Consellería de Sanidade informa do falecemento doutras dúas persoas por mor da pandemia de Covid-19, o que eleva o total a 504, tras romper este venres a barreira psicolóxica do medio milleiro. Trátase dunha muller de 68 anos e un home de 70, ambos os ingresados no CHUS santiagués e ambos con patoloxías previas. Con esta actualización, o número de falecidos en atención hospitalaria ascende a 388, entre os que está unha persoa que recibía atención hospitalaria no seu domicilio.
A consellería de Sanidade informaba pola mañán da morte dun home de 91 anos de idade, no Complexo Hospitalario Universitario de Vigo ( CHUVI); un home de 71 anos, en Povisa; e muller de 97 anos, atendida no Complexo Hospitalario Universitario de Ourense ( CHUO). Todos eles con patoloxías previas, e unha muller de 87 anos de idade, que estaba ingresada no Hospital Público de Verín (Ourense), neste caso, sen patoloxías previas.
Por áreas, rexistráronse 110 mortes na área sanitaria da Coruña, 76 na área de Vigo, 77 na área sanitaria de Ourense, 62 mortes na área sanitaria de Santiago, 23 na área de Ferrol, 25 na área de Lugo e 15 na área sanitaria de Pontevedra. Mantense en 116 o número de falecementos rexistrados dentro dos centros xeriátricos, mentres que ascenden a 113 as persoas vinculadas a centros residenciais que morreron en hospitais ou residencias integradas.

A Xunta de Galicia notificou este venres ao Ministerio de Sanidade a morte de 4 persoas en residencias de maiores, que presentaban síntomas compatibles con infección por coronavirus, pero que non pasaron as probas de confirmación. Tras esta actualización, ascenden a 20 os falecidos en residencias galegas nesas circunstancias desde o pasado 8 de marzo.