AUMENTAN A 448 AS MORTES EN GALICIA

Hai 6.205 casos activos, 58 máis que a véspera A Consellería de Sanidade informa de 6.205 casos de Covid-19 activos en Galicia, o que supón un incremento de 58 con respecto ao anterior balance, que á súa vez consignaba apenas 5 novos positivos.

Son 448 os falecidos
Sanidade informa da morte de catro persoas con coronavirus. Son unha muller de 71 anos ingresada no CHUF de Ferrol, un home de 67 e outro de 79 ingresados no CHUAC da Coruña e unha muller de 93 anos que permanecía no CHUVI de Vigo. Todos contaba con patoloxías previas e con eles elévase a 448 os falecidos pola enfermidade. A cifra de falecidos sitúase en 448. Perderon a vida outras dúas persoas en residencias: en Moledo (Vigo) e en Barreiro, tamén na cidade olívica. Os decesos en residencias chegan a 98, mentres que outros 94 usuarios morreron en hospitais ou residencias integradas.

Baixan os casos activos en residencias Á espera das cifras pormenorizadas da Consellería de Política Social, do balance de Sanidade despréndese que caen os casos activos en residencias. Hai 1.004 usuarios positivos, 8 menos, e 421 profesionais, 3 menos que no anterior reconto.

A presión asistencial queda como segue: hai 112 pacientes en UCI (-3) e 596 hospitalizados (-2), con 5.497 pasando a enfermidade nos seus domicilios. En paralelo, rexistráronse xa 1.536 altas, o que supón un incremento de 29 persoas.
Xa se practicaron 63.715 PCR.

Por áreas sanitarias, non se rexistran cambios substanciais: A Coruña segue á cabeza, destacada, con 1.392 casos activos, seguida como xa vén sendo tendencia por Ourense con 1.233, Vigo con 1.104 e Santiago con 1.034. Máis lonxe, as restantes: Lugo con 595, Pontevedra con 507 e Ferrol con 340.