OITO NOVOS FALECEMENTOS EN GALICIA FAN QUE A CIFRA SE ACHEGUE A 100 MORTOS

Os datos quedan xa desactualizados, pero con 17 vítimas mortais, a deste luns foi a xornada máis letal en Galicia desde o inicio da pandemia de coronavirus. O total de decesos chegaba a 86 e a conta acelerouse nos últimos días en pos do centenar. A Coruña era a área sanitaria máis castigada, con 32 mortes. Cos novos datos facilitados polo Sergas sinalan o falecemento de oito pacientes que estaban infectados por coronavirus. Trátase de tres mulleres de 92, 83 e 75 anos e un home de 92 que estaban todos eles ingresados no Hospital Álvaro Cunqueiro de Vigo; un home de 81 anos ingresado no Hospital Montecelo; dous homes de 77 e 90 anos ingresados no Complexo Hospitalario Universitario da Coruña e un home de 71 anos ingresado no Complexo Hospitalario Universitario de Santiago. «Todos tiñan patoloxías previas», engade a Consellería. Galicia acumula 94 vítimas do Covid-19. O balance diario da Consellería de Sanidade eleva a 3.758 os casos positivos contabilizados en Galicia. Destes, 147 permanecen en UCI, 822 en unidades de hospitalización e 2.789 nos seus domicilios. «Por agora, en Galicia rexistráronse 187 altas de pacientes e 94 falecementos», engade. Na distribución por áreas sanitarias, increméntase notablemente a cifra de Vigo, con 928 casos, seguida dos 817 da Coruña, 547 en Santiago, 520 en Ourense e 371 en Lugo. Pontevedra ten recoñecidos 366 contagios e Ferrol só 209. Ademais, o servizo galego de saúde realizou un total de 17.276 probas diagnósticas.