UN MARIÑEIRO MORTO E OUTRO GRAVE NUN ACCIDENTE MARÍTIMO ENTRE SÁLVORA E ONS

Dúas persoas foron rescatadas esta mañá polo helicóptero Pesca 1 do Servizo de GardaCostas de Galicia despois de caer á auga desde unha embarcación.

Sobre as 11:15 horas, persoal da Sala de GardaCostas informaba ao 112 Galicia da mobilización da aeronave para o rescate das persoas que caeran á auga entre Sálvora e Ons.

Ademais dos servizos sanitarios de urxencia foron informados os axentes da Garda Civil e da Policía Local.

Unha vez rescatados, os tripulantes foron derivados na aeronave ata o Hospital Álvaro Cunqueiro de Vigo.

Segundo informacións de última hora a embarcación que sufriu o accidente é o TUCAN DOUS con matrícula e base en O Grove. Ao parecer un dos mariñeiros da súa tripulación morreu e o patrón está ingresado no Álvaro Cunqueiro, en reanimación xa que, ao tentar salvar ao tripulante desapareceu uns minutos na auga e sofre unha forte hipotermia. Outro dos tripulantes trae o barco a terra. E o cadáver do mariñeiro de preto de 50 anos está sendo trasladado por Salvamento Marítimo.