SEGUE EN ESTADO GRAVE A MULLER QUE CAEU DESDE UNHA CASA

A veciña de Cambados, R. M. V. de 54 anos de idade, que o mércores sufriu unha caída desde uns catro metros de altura cando trataba de almacenar algo nun sobrado sofre unha lesión medular.
Está ingresada no Complexo Hospitalario Universitario da Coruña na unidade de lesionados medulares, en estado grave, segundo informaron desde o centro sanitario. O suceso ocorreu na parroquia cambadesa de Vilariño cando rompeu a corda da polea coa que traballaba e precipitouse ao baleiro, sufrindo un fortísimo golpe.
Desde o primeiro momento os servizos sanitarios diagnosticaron unha lesión medular, posto que a muller carecía de sensibilidade de cintura para abaixo.
Ata o lugar da Laxe, en Vilariño, onde se produciu o incidente, trasladáronse o helicóptero e unha ambulancia do 061, ademais do servizo de Emerxencias e Protección Civil de Cambados e a Policía Local.