ÉXITO NAS VI XORNADAS DE DEGUSTACIÓN E MARIDAXE DOS AUGARDENTES

Preto dun centenar de persoas asistiron este sábado ás actividades das VI Xornadas de Degustación e Maridaxe dos Augardentes e Licores Tradicionais de Galicia, que se celebraron en Cambados. “Todo un éxito de convocatoria”, afirman os organizadores. Os visitantes puideron participar no Túnel dos Augardentes e Licores Tradicionais de Galicia, un espazo expositivo e de cata que puxo a disposición do público máis de 40 referencias -coas súas correspondentes fichas de cata- que se atopan actualmente no mercado. Posteriormente, celebrouse o taller de cata titulado ‘A maxia do Bagazo de Galicia’ -dirixido por Sonia Otero- e a actividade ‘Augardentes e Licores Tradicionais de Galicia na cociña e a coctelería’, que contou coa participación do chef do Casino A Toja, Mark Wernink, e o cociñeiro Fran Castro, que elaboraron tres pratos creados especialmente para a ocasión. Todos eles contaron entre os seus ingredientes con produtos con indicativo de calidade e moi propios para esta época do ano, ademais dos destilados galegos con selo de orixe. Así, degustáronse un Cremoso de Grelos de Galicia con escuma de Queixo Teto e Bagazo de Galicia con faragullas de Lacón de Galicia; Fabas de Lourenzá con Mexillón de Galicia, tendón de Vacún de Galicia e Augardente de Herbas de Galicia, e Jarrete de Vacún de Galicia con Castañas de Galicia, cogomelos e Bagazo de Galicia envellecido. Unhas delicias que se harmonizaron cos orixinais cócteles creados polo barman Anxo Camiña. Seguidamente, o presidente da Asociación de Repostería Tradicional de Melide, Alberto Rodríguez, tomou a substitución para elaborar tres prostres, nos que os destilados galegos con selo de calidade e orixe foron os grandes protagonistas. Para o presidente do Consello Regulador, José Antonio Feijóo, este tipo de actividades “serven para poñer en valor a calidade dos Augardentes e Licores Tradicionais de Galicia e para situalo no lugar que merecen, xa que se atopan á altura dos destilados internacionais de maior referencia”.