A ADEGA CAMBADESA ALBAMAR, PROCLAMADA MELLOR ADEGA GALEGA NOS "PREMIOS MAGNUM" DE GALICIA

Importante presenza da muller e da Ribeira Sacra nos premios do Instituto Galego do Viño, concedidos este domingo no seo da feira Castes (Vilagarcía de Arousa). Para esa zona de Galicia fóronse catro dos oito galardoes entregados este ano, o que referenda a evolución, sobre todo en calidade, experimentada por esta área xeográfica en materia de viño e de enoturismo. Para a Ribeira Sacra foise o premio ao Mellor Viño Galego, que foi para Azos do Pobo 16 de Daterra Viticultores. Ademais, Adega Algueira foi recoñecida como a Mellor Iniciativa de Enoturismo e o programa ‘Voando vou’ de Jesús Quella, producido por Zanskar Producións para Catro, e dedicado á Ribeira Sacra, levou o premio ao Mellor labor de difusión do viño galego. Precisamente, unha das protagonistas dese programa, Esther Teijeiro, foi recoñecida por toda a súa traxectoria co Premio Viñolvidable, que dedicou “a todas as mulleres e homes que desde sempre traballaron no mundo do viño”.

A estas dúas mulleres de Ribeira Sacra premiadas súmase a vilalbesa Elísabet Castro, de Mesón do Campo e ex alumna do Ingavi, que foi recoñecida como a Mellor Catadora do ano en Galicia. Os outros premiados foron Taberna Laredo (Madrid), co Mágnum ao Mellor Tratamento do Viño Galego fóra de Galicia; Cume do Avia dous Cantos 17 (Cume do Avia), co Mágnum ao Mellor Viño Galego Revelación (máximo dúas colleitas) e Adega Albamar, que foi recoñecida como a Mellor Adega Galega. Recolleu o premio un emocionado (e ovacionado) Xurxo Alba, verdadeiro artífice duns dos mellores e máis singulares viños da DO Rías Baixas.