APISALNES, CITA COAS ABELLAS EN VILAGARCÍA DE AROUSA

Os amantes dos produtos da colmea teñen unha cita os próximos días 12, 13 e 14 de outubro na Praza da Pescadería de Vilagarcía de Arousa, onde a Delegación da Asociación Galega de Apicultura no Salnés en colaboración co Concello de Vilagarcía de Arousa organizan a mostra de produtos apícolas Apisalnés, que tamén desenvolverá un completo programa de charlas e actividades para todos os públicos.
Así, haberá charlas sobre apiterapia a cargo dos apiterapeutas José Castro e Leonor Varela, catas, degustacións e talleres, nos que os visitantes poderán gozar dos variados tipos de mel e descubrir como se realiza a extracción do mel da colmea. Os apicultores e apicultoras que se acheguen a Apisalnés terán a ocasión de formarse e actualizar coñecementos de mans de diferentes expertos que ofrecerán interesantes charlas durante os tres días que dura a feira.

Menos mel, pero “de excelente calidade”

O inicio da campaña de recollida de mel en Galicia confirma os prognósticos iniciais que se manexaban e que falaban dun descenso na produción con respecto a anos anteriores. Segundo informa a IGP Mel de Galicia, as diminucións con respecto á pasada campaña estímanse nun 30%, froito dun “ano atípico” no que respecta á climatoloxía, cunha primavera excesivamente chuviosa e un verán extremadamente seco. Os apicultores galegos enfróntanse a un descenso na recollida que, con todo, “non afecta en absoluto -matizan desde a IGP- a uns estándares de calidade que continuarán manténdose intactos”. En calquera caso, a cuantificación deste descenso con respecto á colleita do ano pasado non se confirmará ata finais de ano con todas as declaracións de produción entregadas polos apicultores. Precisamente, a preocupación do sector ante o descenso de produción que se vai a dar esta campaña foi un dos asuntos tratados no pleno ordinario celebrado o martes 2 de outubro, porque a diminución non só afectará os produtores senón tamén ás envasadoras, que terán algunha dificultade para atender a demanda do mercado, algo que “levará a un aumento do prezo do mel en orixe”, avanzan desde o Consello Regulador. Ante este panorama, e cos datos oficiais na man das declaracións de produción, o Consello Regulador celebrará un pleno “no que se revisarán os valores de produción e aplicarase a redución que corresponda nas cotas dos apicultores”, informa o órgano.

PROGRAMA