MENCHU LAMAS DARÁ COR A SALA DE TORRADO

A artista viguesa Menchu Lamas será quen expoña no pazo de Torrado durante os meses de verán na sala que ía estar ocupada por Berta Cáccamo, falecida hai dous meses.
Será desde o vindeiro venres 27 de xullo ata o 23 de setembro.

Menchu Lamas (Vigo, 1954) é unha figura central para entender a pintura contemporánea española. Na década dos oitenta forma parte de Atlántica, un grupo formado por artistas galegos interesados en romper co modernismo manierista propio da época e en situar a arte galega no panorama internacional. A súa obra caracterízase polo emprego dunha cor vibrante que se move entre o íntimo e o monumental, que enaltece e carga de brillo aos obxectos da vida cotiá. Para iso, Lamas opta por amplas pinceladas, cores primarias e o gran formato, sempre baixo a influencia do movemento Pop e dunha iconografía baseada na simplicidade das formas. As súas pinturas forman parte de museos e coleccións públicas como Colección Os Bragales (Santander), Colección de Arte Contemporánea “A Caixa” (Barcelona), CGAC Centro Galego de Arte Contemporánea (Santiago de Compostela), MACBA Museu d' Art Contemporani de Barcelona (Barcelona) ou MNCARS Museo Nacional Centro de Arte Reina Sofía (Madrid).