CONTINÚAN 5 PERSOAS INGRESADAS DO ACCIDENTE DO CATAMARÁN

A Consellería de Sanidade informa de que a día de hoxe permanecen ingresadas 5 das 23 persoas que onte tiveron que ser atendidas nos centros hospitalarios como consecuencia do accidente rexistrado en O Grove. Dúas delas, con queimaduras graves, continúan ingresadas na unidade de queimados do CHUAC e permanecen estables. Os outros tres feridos, con queimaduras graves, están ingresados en Povisa. Os 18 pacientes restantes que tiveron que ser atendidos con pronósticos de menor consideración nos hospitais de Montecelo (7), no Hospital do Salnés (8), no Hospital Provincial de Pontevedra (1) e no Hospital Domínguez (2) foron todos dados de alta. 

Varias testemuñas sinalaron que se produciu unha explosión a bordo, ao parecer na cociña, que foi a que desatou o incendio. Os pasaxeiros tiveron tempo de tirarse ao mar, onde foron inmediatamente rescatados por outros barcos turísticos e embarcacións recreativas particulares que se achaban na zona, moi concorrida durante estes meses de verán.

En total foron 48 as persoas que resultaron feridas de diversa consideración; 25 delas non precisaron ser trasladadas a centros hospitalarios e recibiron asistencia no Punto de Atención Continuada (PAC) de O Grove e no mesmo lugar do suceso.

Dende o Sergas, a través das Urxencias Sanitarias de Galicia-061, mobilizáronse 2 helicópteros; 3 ambulancias asistenciais de soporte vital avanzado; 12 ambulancias de soporte vital básico; 1 equipo sanitario do PAC de O Grove e outro do PAC de Baltar (Sanxenxo), 1 vehículo de apoio loxístico e 4 ambulancias de apoio. Ademais tamén participaron 3 ambulancias de Protección Civil (2 de Vilagarcía e 1 de A Estrada). 

A Consellería de Sanidade agradece a profesionalidade e o esforzo de todos os traballadores sanitarios, hospitais e centros de saúde, puntos de atención de urxencias e Urxencias Sanitarias de Galicia-061.