O QUE PUDO SER UNHA TRAXEDIA QUEDOU NUN GRAN SUSTO

A rápida intervención dos efectivos de Emerxencias, Bombeiros, 061, Policía Local, Protección Civil de Cambados e Garda Civil evitaron esta mañán unha traxedia en Cambados.

O Consorcio Provincial Contra incendios mobilizou a dous vehículos dos parques de Ribadumia e Vilagarcía ante o aviso do incendio nun edificio de cinco plantas en Cambados.

Os efectivos de Ribadumia chegaron en cinco minutos, tras recibir o aviso do servizo 112 pasadas dous minutos das sete da mañá, e nese intre a Garda Civil xa estaba desaloxando a tres veciños do inmoble. En doce  minutos se presentaron os efectivos do parque de Vilagarcía e se procedeu a evacuación da totalidade do edificio dada a alta carga de combustión que presentaba o incendio e a gran cantidade de fume. Preto de vinte persoas foron desaloxadas e unha ducia foron remitidas ao Hospital do Salnés por presentar problemas respiratorios polo fume. 
Os residentes no edificio recibiron a alta médica tras resultar intoxicados por inhalación de fume agás, os ocupantes do piso que ardeu que permanecen ingresados en observación. Pola súa banda, tanto a alcaldesa de Cambados, Fátima Abal, como o concelleiro Xurxo Charlín visitaron aos doce feridos e agora están en contacto coa Administración de Fincas "por se os veciños afectados necesitan algún tipo de axuda para pernoitar". Ademais, sinalou que "os técnicos están a estudar os danos materiais para ver se non afectan á estrutura do edificio"
Concello, compañías de Seguros e a administración do edificio están colaborando para ubicar aos veciños que non poderán acceder as súas vivendas ata dentro duns días.

Os dous equipos do Consorcio Provincial que se desprazaron con sendas bombas urbanas, de máis de tres mil litros de auga cada unha, desenvolveron un intenso traballo pola alta carga térmica da vivenda que obrigou a empregar gran cantidade de auga. O incendio afectou a esta vivenda e o resto de edificio rexistrou danos menores. Os bombeiros de Vilagarcía retiráronse pasadas as nove da mañá unha vez extinguido o incendio e no lugar permaneceu ate as doce da mañá a brigada de Ribadumia para desescombro e refresco da vivenda afectada.

Lembrade que este tipo de acumuladores ou outros sistemas de calefacción das nosas casas deben estar apartados de roupa ou mobles  que poidan ocasionar accidentes coma este ou máis graves e que costen vidas humanas.

Que facer en caso de incendio?

A mellor forma de protexerse cando se produce un incendio no fogar é manter as fiestras pechadas, pois as correntes de aire avivan o lume. Ademais, se detectas que o incendio afecta á instalación eléctrica, debes cortala canto antes. E se ves que podes usar un extintor, lembra que as lapas deben sufocarse dende a súa base. Tamén,

- Se a estancia está chea de fume, agóchate e avanza a ras do chan ata a saída máis próxima, xa que a temperatura é máis baixa e o aire máis limpo

-  Se prende lume na roupa dunha persoa, faina rodar polo chan.

-  Se te atopas no interior dun lugar público, alerta e procede á evacuación polas saídas de emerxencias. Non uses o ascensor.

-  Se o que prendeu foi un líquido inflamable, aplica panos húmidos.

-  Se o lume está no interior dun recipiente, tápao.

NOVE PERSOAS AFECTADAS POR UN INCENDIO EN CAMBADOS