TURISMO ENOGASTRONÓMICO PRIORIDADE PARA O PET DE PONTEVEDRA

A enogastronomía, o turismo de sol e praia, as festas de interese turístico e os grandes acontecementos (como os festivais Rías Baixas), o Camiño de Santiago e o turismo de aventura, cultural e de natureza son os produtos prioritarios puntualizados nas máis de 192 enquisas realizadas en 140 empresas do sector e aos responsables de turismo de 61 concellos da provincia de Pontevedra. Todo iso dentro do Plan de Concertación, unha primeira fase que integra a posta en marcha dun próximo Plan Estratéxico de Turismo de Pontevedra 2017-2020, e que foi presentado na Deputación de Pontevedra pola súa presidenta, Carmela Silva, acompañada do deputado da área, Santos Héctor, e por técnicos da consultora Valora, empresa que gañou o concurso público da análise e posterior desenvolvemento do que serán as claves mestras do turismo que promocionará Pontevedra, un sector que a día de hoxe representa o 11% do PIB da provincia.

O fundamental desta presentación -que contou coa presenza de máis dun centenar de invitados entre alcaldes, responsables das áreas de turismo, empresarios e profesionais do sector- é que se detectaron claramente cales son os intereses que demandan todos os implicados, desde a situación actual -pasando pola profesionalización do sector- ata a identificación dos retos principais, como a desestacionalización do turismo, a diversificación da oferta ou a estratexia de colaboración cada vez máis próxima entre as distintas Administracións e o sector privado.


Entre os resultados presentados obsérvanse curiosas pero interesantes conclusións como que os destinatarios principais das promocións do turismo pontevedrés deben orientarse a nivel nacional cara a Madrid, País Vasco e o resto de Galicia, principalmente, e potencialmente cara a Cataluña e Andalucía; en tanto que internacionalmente os enquisados destacan ao Reino Unido, Alemaña e Francia, recoñecendo tamén a Portugal e aos Países Baixos entre outros destinos preferentes das promocións do turismo pontevedrés. Outro aspecto relevante é o que se refire á formación do sector, capítulo onde se detectaron necesidades fundamentais como a profesionalización da atención ao cliente, a urxencia do dominio de idiomas e o incremento da innovación turística.

Durante o acto, Carmela Silva destacou que agora se inicia unha segunda fase do Plan Estratéxico de Turismo (PET), "desexando que este manual branco do turismo da provincia podamos presentalo oficialmente e para o seu desenvolvemento no próximo mes de decembro".