ESTA TARDE EMPEZA O PLAY-OFF PARA O XUVEN

A eliminatoria dos "novatos" con ambición. Os galegos loitaron polo ascenso directo ata a penúltima xornada, mentres que os andaluces métense en playoffs por segunda ocasión consecutiva na súa segunda tempada. A ambición dun Cambados Cidade Europea do Viño que practicou un gran baloncesto, e a dun Aceitunas Fragata Morón que xa puxo en apretos o ano pasado ao Sáenz Horeca Araberri na eliminatoria de cuartos de final.

O equipo amarelo ven de culminar unha das tempadas máis espectaculares da súa historia cun segundo posto máis que merecido grazas a un baloncesto vibrante, cunha clara vocación ofensiva e protagonizando refachos de vitorias verdadeiramente impoñentes. Polo camiño deixou grandes malleiras e liderou durante moito tempo a clasificación. Pero tamén atravesou unha mala serie na que perdeu con claridade varios partidos, descolgándose por momentos da parte alta da táboa. Aceitunas Fragata Morón foi un dos equipos que experimentou esas dúas caras na fase regular: durísimo correctivo na visita á cancha galega (90-61) e derrota contundente na visita ao Pavillón Alameda (90-77).

Hoxe volven verse as caras no primeiro duelo de, polo menos, tres. E fano cunha nova perspectiva en canto aos obxectivos. Xuven Cambados parte como favorito, por calidade e posición na clasificación, pero atravesa certos problemas que poderían condicionar a eliminatoria. Olivas Fragata Morón, pola súa banda, viaxa sen presións, para gozar e facer gozar aos seus. Pero iso non quere dicir que se vaia a facer turismo. Ambos os equipos teñen un xene competitivo que lles obriga a buscar a vitoria ata o último suspiro, e iso é o que veremos no partido.

Aceitunas Fragata Morón viaxa con todos os seus xogadores, recuperados xa Chagoyen e Rodríguez das súas lesións, polo que Rafa Rufián poderá dispoñer dunha maior rotación de minutos para esta viaxe tan longa. Necesitará o equipo mostrar o seu mellor cara, a que sacou en xaneiro, para frear a un conxunto que pechou a tempada con máis de 2500 puntos anotados (a maior marca da tempada) grazas a xogadores como Charles Nkaloulou (410 puntos, nada menos) ou Erik Quintela, un dos directores de orquestra xunto a Adriá Baiget e Adrián Chapela. Un persoal con moita calidade que quererá continuar coa súa tempada de ilusión na súa casa, ante o seu público.

O primeiro asalto por unha praza nas semifinais do play-off comeza ás 20:45 horas. O partido disputarase no Pavillón Municipal O Pombal de Cambados.



2º partido: domingo 30- 18:00 En Cambados
3º partido: venres 5- 21:00 En Morón
4º partido: domingo 7- 12:00 (se fose necesario) En Morón
5º partido: martes 9- Horario por decidir (se fose necesario) En Cambados