O PERSOAL DOCENTE DO PROGRAMA "DEPOEMPRENDE NA ESCOLA" COMPARTE AS EXPERIENCIAS DO EMPRENDEMENTO

O persoal docente que participa no programa "DepoEmprende na Escola" comparte as experiencias de emprendemento

O Centro de Formación e Recursos de Pontevedra acolle, o 18 de xaneiro, unha xornada de titoría, na que se fará un seguimento das actividades realizadas no que vai de curso

O profesorado dos nove colexios participantes no programa "DepoEmprende na Escola" terá a oportunidade de poñer en común as experiencias que se están a desenvolver nos respectivos centros durante a primeira xornada de titoría deste curso, que terá lugar, o mércores 18 de xaneiro, no Centro de Formación e Recursos de Pontevedra.

Os centros participantes este curso no programa, dirixido a alumnado de 4º, 5º e 6º de Primaria dos colexios públicos da provincia de Pontevedra, son o CEIP Plurilingüe núm. 1, de Tui; o CEIP Barcelos, de Pontevedra; o CEP Plurilingüe Riomaior, de Vilaboa; o CEE Príncipe Felipe, de Pontevedra; o CEIP A Rúa, de Cangas; o CEIP Frián-Teis, de Teis; o CEIP Xulia Becerra, de Ribadumia; o CEP Antonio Magariños Pastoriza, de Cambados; e o CEIP Laredo, de Redondela.

Esta xornada de titoría é a primeira das tres que se desenvolverán durante este curso, que, xunto coas sesións de aprendizaxe para o profesorado desenvolvidas en setembro, permitirán completar un total de 20 horas de formación certificada, coas que o profesorado poderá obter as ferramentas necesarias para que o seu alumnado adquira a competencia emprendedora que este proxecto persegue, para que, durante o curso escolar 2016/2017, as rapazas e os rapaces creen e xestionen unha cooperativa na que fabriquen produtos para vender nun mercado ou feira da súa localidade.

O programa "DepoEmprende na Escola" ten como finalidade, ademais do obxectivo xeral, o desenvolvemento de distintas competencias asociadas á comunicación, análise da contorna física, creación, convivencia e cidadanía ou alfabetización dixital, entre outras. A comunidade escolar da provincia disporá, entre outros recursos, dun portal educativo en internet no que se lles ofrecerá información e documentos de apoio cos que reforzar os contidos dos materiais didácticos usados nas aulas, así como para facer as súas propias achegas para facilitar a coordinación do proxecto.

A súa metodoloxía sitúa o alumnado como protagonista da súa propia aprendizaxe, xa que se basea nun traballo desde a práctica, no que esa aprendizaxe é activa, cooperativa e significativa, no que a relación entre o centro educativo e os feitos acontecidos na súa contorna máis próxima estarán presentes a diario. A materia incluída no programa desenvolverase dun xeito transversal, de modo que o alumnado adquirirá coñecementos en distintas áreas de coñecemento, coma matemáticas, ciencias, linguaxe, cultura e tamén competencia dixital, social e cívica ou "aprender a aprender".