ÉXITO DO TÚNEL DO VIÑO SEGUNDO O CONSELLO D.O. RIAS BAIXAS

O Túnel do Viño Rías Baixas segue sumando seguidores edición tras edición, o que lle está permitindo converterse no gran referente da programación da Festa do Viño Albariño Denominación de Orixe Rías Baixas cun constante incremento no número de visitantes, que nesta ocasión superaron as 550 persoas. As instalacións do Salón de Exposicións e Congresos José Peña de Cambados acolleron un ano máis este evento que permitiu degustar 132 marcas desta denominación, ademais de asistir a algunha das 11 Catas Temáticas ofrecidas por outras tantas adegas.

Este aumento no número de participantes foi corroborado polo catador Nacho Costoya, coordinador desta actividade, quen destacou "o gran interese que está a espertar no público e, tamén, o feito de que os participantes estiveron moi receptivos a probar añadas anteriores e ir acabando co mito de que hai que consumir o viño do ano". O perfil do público que se achegou polo túnel "é moi diverso desde o profesional en busca de elaboracións novas ou que desexa ver como é a anada actual; adegas que queren ver o que hai no mercado e, mesmo, que fai a competencia; ata aqueles que acoden por primeira vez e con esta experiencia danse conta da gran diversidade de elaboracións que hai nesta Denominación de Orixe como son os espumosos, os tintos, os plurivarietales ou as elaboracións especiais", explica Costoya. Un público moi heteroxéneo composto, por exemplo, por profesionais de Madrid, de Jumilla, de Cádiz ou de Portugal... Pero tamén houbo unha importante afluencia de amantes do viño madrileños, vascos, mesmo, finandeses, e, como non, de toda Galicia como pode ser unha parella de Ribadeo.


XXVIII Cata Concurso Rías Baixas Albariño

Outro dos momentos máis esperados tras o Xantar son os Premios da XXVIII Cata Concurso Rías Baixas Albariño. Nesta ocasión, a medalla de ouro recaeu en Vionta, da Adega Vionta, mentres que a de prata foi para Valmiñor da adega Valmiñor, e a de bronce para Lagar de Cervera da adega Lagar de Fornelos. 

Tras catar 54 marcas de Rías Baixas en dous días, os 24 profesionais que integraron o panel de cata da XXVIII Cata Concurso Rías Baixas Albariño realizaron o importante reto de elixir os mellores albariños Rías Baixas da anada 2015. Todos eles coincidiron en que na Cata Derradeira había gran calidade e homoxeneidade. Mª Jesús Tomei (xefa de informativos en tusdestinos.net e especialista en contidos de turismo e lecer) explicou que "a Cata Derradeira foi moi dinámica e houbo viños que me gustaron moito". Neste sentido tamén se manifestou Vicente Morcillo (xornalista especialista en viños, coordinador da sección de viños e gastronomía do Levante): "En xeral destacaría o gran nivel dos viños. A Cata Prima foi menos homoxénea e con máis diferenzas entre as marcas e na súa puntuación, mentres que a Cata Derradeira foi moi homoxénea". 
Anna Vicéns (presidenta da Asociación de Catadoras de Cataluña, ademais de prescriptora do mundo do viño e a gastronomía) coincidiu en que "no primeiro día foi máis fácil facer unha selección, pero o último estaba xa moi igualado o nivel e para min foi complicado, porque había poucas diferenzas de calidade". Pola súa banda Enrique do Río (director do Diario de Gastronomía e coordinador da revista Matador da editorial A Fábrica) indicou: "Eu diría que todos os viños posúen unha gran calidade, a denominación vai cumprindo anos e iso nótase". Coincidiu nesta afirmación tamén con Luís Cepeda (xornalista, crítico, e cronista gastronómico en Sobremesa, Esquiere, Elle-Gourmet, Orixe, Restación News, Canle Cociña, Restauradores, Spain Gourmetour e Canle de Casa), para quen "hai unha regularidade de calidade. Calquera dos viños catados serían excelentes se chos servisen nun restaurante".