O FUTURO DO XUVEN PASA POR GAÑAR MAÑÁN

Con todos os encontros comezando ás 19:00 h., o primeiro sábado do mes de abril promete emocións fortes na LEB Prata. Penúltima xornada de competición, cos postos de cabeza de serie en xogo, sobre todo, en Granada, e coa pelexa pola salvación a lume vivo en Torremolinos, Morón de la Frontera, Tarragona e Cambados.
A ecuación é moi clara para o conxunto amarelo no seu último partido en O Pombal: todo o que non sexa gañar ao pechacancelas da LEB Prata, xa descendido, supoñería complicarse moitísimo a súa existencia na competición e ter que ir xogarse o todo polo todo a Amorebieta. Un triunfo de Xuven Cambados, se vén acompañado dalgunha derrota por parte de Simply Olivar ou Brico Depôt Cidade de Valladolid, aliviaría moitísimo a preocupante situación dos galegos, penúltimos clasificados, aínda que deberían rematar a faena na última xornada. Viten Xetafe chega sen nada en xogo a terras galegas, aínda que os de Armando Gómez poden exercer un decisivo papel de xuíces do descenso, xa que a semana que vén pecharán a tempada en casa ante Valladolid.

O Pombal rozou o cheo durante toda a tempada
, de feito durante as tres campañas que o equipo leva na LEB Prata así foi, mañá espérase unha afluencia aínda maior. A directiva decretou a xornada da portas abertas nun intento de animar, aínda máis se cabe, á afección amarela para que acuda ao encontro.

O Xuven púidose adestrar con normalidade durante a semana. O nocello de Juanchi mellorou e as sesións, tanto nesta semana como xa na anterior, gañaron en intensidade. Hoyo asegura que está moi satisfeito de como se desenvolveron.

Atención a: O manexo da presión por parte dos galegos, sobre todo en caso de chegarse a un final apertado.

O dato: Os de Miguel Ángel Hoyo non gañaron na casa en 2016. Seis derrotas seguidas para un balance total como locais de 4-8.

Na primeira volta: 71-90 para Xuven Cambados.