A MOSTRA "OS TRABALLOS E OS DIAS DE PACO LEIRO" XA SE PODE VISITAR.

Unha nova exposición impulsada por Abanca e Afundación aborda a traxectoria do escultor cambadés Francisco Leiro cunha mostra dalgunha das súas obras máis representativas, á vez que indaga nas reviravoltas do proceso creativo cunha sección audiovisual dedicada ao traballo do artista e a profunda reflexión que hai detrás das súas pezas.

Co título 'Os traballos e os días de Francisco Leiro', a exposición permanecerá no Centro Abanca Obra Social de Santiago de Compostela ata o próximo 4 de xuño. Nun futuro, poderá visitarse en Vigo e Pontevedra e os organizadores estudan levala máis aló das fronteiras galegas.
A mostra consta de dúas seccións. A primeira, nun nivel superior, presenta 12 obras escultóricas de gran formato, algunhas de principios dos anos 80 e outras máis recentes, como o 'Fauno' de 2003 ou 'As Recolectoras' de 2007, dedicada ás mulleres que colaboraron na limpeza das costas galegas tras a catástrofe do 'Prestige'. Todas elas "moi potentes e importantes no seu catálogo", que permiten realizar un percorrido polo traballo de Leiro ao longo de máis de 30 anos de carreira e coñecer os diferentes materiais cos que traballaba, como a pedra e a madeira.

A segunda parte da exposición, nun nivel inferior do centro e máis centrada en contidos audiovisuais, presenta parte dos seus debuxos e un avance do documental 'Sísifo Confuso', un traballo desenvolvido ao longo de tres anos a cargo de Aser Álvarez, comisario desta mostra. O propio Álvarez explicou que a idea partiu dun proceso de indagación e investigación sobre as reviravoltas da obra de Leiro, seguindo ao artista desde o seu taller en Cambados, ata unha exposición en Madrid e Nova York, lugar de "desconexión" para o escultor. Tras o traballo de Leiro. O obxectivo desta segunda parte é mostrar "o que hai detrás da obra de Leiro", pregunta que orixinou todo o proceso que levou ata a decisión de realizar un documental, e para iso buscouse plasmar a un artista en plena madurez, desde unha certa distancia, co seu "extraordinario proceso reflexivo" e a súa "capacidade época de traballo". "É un artista que non esta preocupado polo márketing, senón polo proceso creativo", sinalou, polo que tomaron a decisión de gardar esa distancia prudencial e "tratar de mostrar ese proceso intensísimo sen verbalizarlo, sen que teña que teorizar". En definitiva, "ser o máis respectuosos posibles con el", e explicar ese proceso que hai detrás do resultado simplemente mostrando a

súa forma de traballar e conceptualizar a súa obra. Esta sección estrutúrase mediante unha pequena mostra de fotografías as súas obras que permanecen en Santiago, que seguen a imaxes do seu taller en Cambados e do seu estilo de traballar, o que chaman "o principio do mundo de Leiro". Posteriormente, a través dun corredor con parte do debuxo e serigrafía do autor (paso previo á escultura), móstrase o traballo de Leiro en Madrid na exposición 'Purgatorio', ademais dunha viaxe a Nova York. Estas fotografías acompáñanse de diversos vídeos e paisaxes sonoras en loop, realizados mediante sons do propio traballo do escultor usando as súas ferramentas.

Enlaces relacionados:

Sísifo Confuso. Traballos e días de Francisco Leiro

VIDEO