CONCELLOS DE PONTEVEDRA INTERESADOS NO MODELO NAVARRO DE COMPOSTAXE

A viaxe a Navarra organizada polo vicepresidente da Deputación César Mosquera para dar a coñecer novos sistemas de xestión do lixo aos concellos de Pontevedra ten xa o seu primeiro froito: son varios os municipios que teñen pensado implantar experiencias piloto de composteiros colectivos en barrios, parroquias ou núcleos de poboación de forma inminente. Así o manifestaron os representantes de Barro, Vilaboa, Lalín, Sanxenxo ou Valga, entre outros.

Tódolos concellos presentes na expedición pontevedresa (26) mostraron a súa satisfacción pola experiencia da viaxe, ao poder coñecer in situ diferentes modelos de xestión do lixo e escoitar a técnicos pioneiros na compostaxe nas xornadas organizadas pola Universidade Pública de Navarra. Por todo isto tanto alcaldes como concelleiros e técnicos agradeceron a iniciativa ao responsable de Medio Ambiente da Deputación, o vicepresidente César Mosquera, así como a posta a disposición de técnicos durante este mandato. Pola súa banda, a deputada Eva Iglesias, destacou o interese mostrado en todas e cada unha das visitas, así como a participación e curiosidade mostrada en tódalas conferencias.

O programa deseñado pola Deputación incluíu unha visita a unha pequena instalación de compostaxe de Larrabetzu, onde se fai un tratamento comunitario entre familias e dous restaurantes que xestiona un agricultor da zona. Tamén se coñeceron as instalacións da nova planta de compostaxe de Epele, aínda sen poñer en marcha, e que polas súas dimensións é moi parecida á que se prevé instalar en Pontevedra (salvando diferencias técnicas).

Na segunda xornada da viaxe, os 45 representantes pontevedreses estiveron nas instalacións dos Traperos de Emaús, onde recibiron explicacións sobre o funcionamento de esta organización que ten como obxectivo darlle unha 'segunda vida' ao lixo. Tamén se visitou o Avicompo e o Parque dos Sentidos en Noáin, onde se utilizan as galiñas como volteadoras do compost.

Na terceira xornada visitáronse Irurtzun, Leitza e Ursurbil, tres localidades con composteiros comunitarios nas que os veciños se fan cargo do mantemento e da xestión. Na última vila está instalado un sistema de recollida porta a porta.

No curso de verán de Alsasua coñecéronse experiencias de Italia, Cataluña, Navarra, Ourense e Compostela da man de técnicos recoñecidos internacionalmente.

Visita a Latpax

A expedición Pontevedresa realizou onte pola mañá a súa última visita a unha planta de tratamento de lixo: a planta de compostaxe de Latpax, que traballa cos residuos orgánicos de sete municipios da provincia de Guipúzcoa (3.000 toneladas por ano).

Esta planta de tratamento abriuse no ano 2008 como experiencia piloto cunha grande e custosa tecnoloxía para realizar o compost. Nun primeiro momento o tratamento realizábase en tambores autotérmicos xiratorios estancos. Este procedemento nunca chegou a funcionar correctamente, aínda que se mantivo durante catro anos. A partir de entón simplificouse o proceso de forma drástica e pasouse a facer a compostaxe de xeito mecánico-manual cunha volteadora acumulando os materiais en pilas.

Actualmente prodúcense 900 toneladas anuais de compost de gran calidade (tipo A), que se vende ao prezo de 30 euros por tonelada. O éxito da planta de Latpax, segundo os seus técnicos, débese ao gran traballo que fan os veciños da zona na separación en orixe do lixo orgánico e do resto das fraccións. De feito, son poucos os camións de biorresiduo que son devoltos aos concellos por non ter clasificado correctamente os desperdicios.

•