TUROPERADORES E XORNALISTAS FILIPINOS VISITAN GALICIA

Unha viaxe de familiarización para turoperadores turísticos e xornalistas do Channel 7 de Filipinas, coordinada por Turismo de Galicia coa colaboración da Oficina Española de Turismo de Singapur, estase a desenvolver durante estes días en Galicia.
No día de hoxe os turoperadores turísticos e xornalistas filipinos exploraron as Rías Baixas. A primeira parada foi en Vilagarcía de Arousa onde visitaron os xardíns do Pazo de Rubiáns, pertencentes á Ruta da Camelia, a flor insignia de Galicia. A segunda parada foi en Cambados, a capital do Albariño, onde coñeceron o Pazo de Fefiñáns e o barrio mariñeiro de Santo Tomé. Así mesmo,  gozaron da illa da Toxa e do seu club termal.

A tarde estará dedicada a coñecer unha das praias máis longas de Galicia, A Lanzada, e a cidade de Pontevedra, onde visitarán o seu centro histórico e a igrexa da Peregrina.

O programa comezou o sábado cunha visita ao Cebreiro onde puideron descubrir a porta de entrada da primeira etapa en solo galego do Camiño Francés, gozar dunhas vistas panorámicas únicas e coñecer varios exemplos das tradicionais pallozas galegas. Pola tarde, trasladáronse á cidade de Lugo para visitar a vila romana máis antiga de Galicia e a súa muralla única no mundo.

O domingo o grupo visitou Sarria, o punto de partida de miles de peregrinos cada ano, para facer un tramo do Camiño Francés dende Furelos a Melide. A continuación, visitaron a capital galega na que realizaron un percorrido polo casco antigo de Santiago e coñeceron a Catedral.