"TEATRO CARACOL" ESTREOU ONTE UNHA DE SUPERHEROES

A compañía de teatro Caracol suma e segue. Dende onte e ata o 19 de abril ofrecen unha nova entrega teatral para os nenos dos colexios de Cambados e doutros da bisbarra como os de Corón, Dena e Vilalonga. Vintedous anos xa desde que comezaron a sua andaina. Esta vez regresan ao instituto Francisco Asorey cunha de superheroes, de modo que polo escenario se pasearán Supermán, Capitán América, Lanterna Verde... e Batman, que é o protagonista indiscutible da montaxe que leva o seu nome.

A compañía Caracol naceu hai dúas décadas por iniciativa dun grupo de pais que tiñan fillos en idade escolar e tiveron a feliz idea de actuar para os rapaces. Aqueles nenos xa son homes e mulleres, pero os pais de entón e outros que se incorporaron despois seguen preparando cada inverno unha obra de teatro para levala a escena en primavera e facelo pasar un anaco agradable a centos de nenos de Primaria.

Para os adultos tamén haberá función. Será, como sempre, o domingo, con pases ás seis e ás oito da tarde. As entradas pódense retirar nos establecementos de Cambados Sansatur e Chinelas por 3 euros.