HOMENAXE A TERESA PLASENCIA

A morte de Teresa Plasencia o pasado agosto colleunos a todos por sorpresa. A enfermidade apenas deulle uns días de tregua e levouna aos 59 anos de idade. Tiña pensado xubilarse en febreiro pasado como mestra no instituto Ramón Cabanillas (Cambados). Por iso que se elixeu esta data como a máis idónea para recordar á que fose profesora de Lingua e Literatura no centro durante 31 anos.

A cita será mañán 27 de marzo e o acto terá un carácter sobrio e íntimo no que participarán profesores, alumnos de Bacharelato e exalumnos. Algúns foron escollidos para ler textos dedicados ou inspirados en Plasencia, e non faltará a música nin tampouco a proxección dunha montaxe audiovisual na que se repasará parte da historia do instituto cambadés seguindo a estela que deixou a profesora de Literatura.

O acto arrancará ás 11.30 horas no salón de actos, con entrada limitada. Hai que contar aos seus alumnos i ex-alumnos por milleiros tendo en conta que as súas materias eran das obrigatorias, e que durante esas tres décadas pasaron rapaces e rapazas de Cambados, Meaño, Ribadumia, O Grove, A Illa, Meis ou Vilanova.