O PARTIDO DO XUVEN SEGÚN A PRENSA VASCA

O Zornotza arrancou o ano cunha vitoria máis sinxela do esperado que lle permite concluír a primeira volta da Adecco Plata no quinto posto, a un triunfo de distancia do trío que lle precede e que comanda o Guadalajara, que ao final será quen dispute a Copa ante o Amics Castelló, líder destacado con só unha derrota ata agora, precisamente na cancha vizcaina.

A visita a Larrea del Xuven Cambados tomábase con respecto xa que os galegos chegaban cunha tarxeta de cinco vitorias consecutivas, pero á hora da verdade a resistencia dos visitantes durou menos de cinco minutos. Dun 6-8 pasouse a un 18-8 cun parcial de 12-0 que encarrilou o partido de forma temperá. OZornotza, malia as súas pésimas porcentaxes no tiro exterior (3 de 21 en triplos), non tivo problemas para anotar ante os pobres argumentos do xogo do Cambados.

A firmeza defensiva dos de Mikel Garitaonaindia permitiu lanzar transicións que romperon o choque antes do descanso, ao que se chegou cun sorprendente 42-23 para o Zornotza e un 70% en tiros de dous para os verdes, que contrastaba co único triplo anotado en dez intentos. Pero Bowman e Borovnjak fixérono doado e os seus puntos lanzaron o seu equipo.
O do Cambados foi peor porque só anotou nove canastras en xogo en toda a primeira parte na que non puido impoñer a súa superioridade física nalgúns emparellamento. O normal tería sido esperar un cambio de actitude por parte dos galegos, pero as ganas perdéronse na viaxe. O Zornotza chegou a dobrar no marcador (51-25) un rival apático e despreocupado.

Deste xeito, a segunda parte foi un suplicio sen ningunha tensión xa que dous non se pegan se un quere e o Cambados quixo demasiado tarde, xa no último cuarto cando todo o peixe estaba vendido. Por pura dignidade, os visitantes elevaron o nivel de contactos, os árbitros deixaron facer e o Zornotza, que tiña o partido a bo recado, levantou o pé do acelerador e viuse atrapado nun correcalles que todo o mundo desexaba que rematase canto antes.

Os minutos finais só serviron para que o técnico vizcaino dese algún respiro aos seus xogadores principais e puxese en cancha o mozo do filial Andoni Ordóñez. A vitoria non perigaba dende había moito anaco, aínda que quedou a impresión de que o Zornotza vai ter que mellorar, e quizais reforzar o equipo, para afrontar os difíciles compromisos que se lle aveciñan. A próxima semana comezará a segunda volta ante o Cáceres co obxectivo claro, e asumido polo técnico, de intentar alcanzar o play-off co factor cancha a favor. 

Roberto Calvo para o diario DEIA