PRESENTADOS OS CADERNOS RAMÓN PIÑEIRO( Vol.XXVII)

O volume, coordinado por Luís Alonso e por Xosé Luís Cochón, recolle cartas inéditas de Ramón Piñeiro, Ben-Cho-Shey, Ramón Cabanillas e Otero Pedrayo a Fermín Penzol

O salón de actos do Centro Ramón Piñeiro para a Investigación en Humanidades (CRPIH) acolleu onte a presentación do volume Cadernos Ramón Piñeiro (XXVII). Cartas a Fermín Penzol nun acto presidido polo secretario xeral de Política Lingüística en representación da Consellería de Cultura e Educación, da que depende o CRPIH.

Na súa intervención, Valentín García deulles a benvida aos asistentes á nova sede do Centro Ramón Piñeiro, no Pazo de San Roque. Xa referíndose ao libro que acudira a presentar, o secretario xeral resaltou os esforzos de Fermín Penzol e da Xeración Galaxia por manter vivo o facho do galego durante os difíciles tempos da posguerra. Gabou a xenerosidade de Penzol, ilustre mecenas da nosa cultura, e mais das persoas que neses anos dedicaron a súa vida á lingua propia de Galicia, a quen presentou como “referentes para todos os bos e xenerosos do século XXI”.

Acompañaron o secretario xeral na mesa Xulio Souto Jiménez, vicepresidente da Fundación Penzol; Manuel González González, director científico do Centro Ramón Piñeiro; Xosé Luís Cochón, un dos coordinadores do volume e o escritor Xosé Luís Méndez Ferrín.

Cartas a Fermín Penzol
O XXVII volume dos Cadernos Ramón Piñeiro segue unha das liñas de traballo do centro de investigación dependente da Consellería de Cultura, Educación e Ordenación Universitaria, consistente en dar ao prelo material epistolar da autoría de sobranceiras figuras da literatura ou dos estudos filolóxicos galegos. Neste caso, trátase dun feixe de cartas que Ramón Piñeiro, Ben-Cho-Shey, Ramón Cabanillas e Ramón Otero Pedrayo lle enviaron a Fermín Penzol. As misivas reprodúcense con escrupuloso respecto aos textos orixinais e complétanse con abondosas observacións críticas.

 

O Centro Ramón Piñeiro para a Investigación en Humanidades
O CPRIH, dependente da Consellería de Cultura e Educación, ten a finalidade de promover, desenvolver e darlles difusión a proxectos galegos de estudos lingüísticos, literarios, históricos e antropolóxicos. Na actualidade, centra as súas liñas de investigación en lingüística con aplicacións informáticas, en prosa e poesía medieval, na recuperación e análise de publicacións literarias e en proxectos de antropoloxía referidos á identidade colectiva.