DEFINIDOS OS PERCORRIDOS DE "LA VUELTA-14" POLA PROVINCIA DE PONTEVEDRA

O Castelo de Salvaterra de Miño será o punto de partida da segunda das etapas da Volta Ciclista a España que se disputará na provincia de Pontevedra, cun final inédito na península do Morrazo e, concretamente, no concello de Cangas.

Así o anunciou esta mañá en rolda de prensa o presidente da Deputación, Rafael Louzán, acompañado da secretaria xeral para o Turismo da Xunta de Galicia, Nava Castro; da deputada delegada de Deportes, Begoña Estévez, do alcalde de Cangas, José Enrique Sotelo; e da tenente de alcalde de Salvaterra de Miño, Marta Valcárcel; que coincidiron en subliñar o efecto de promoción e de revulsivo económico que esta proba ciclista suporá para a provincia e para o sector hostaleiro e de restauración.

Nesta liña, Nava Castro incidiu en que os datos de ocupación de agosto de 2013 demostran este efecto, dado que se acadaron cifras máximas de ocupación hostaleira, lográndose en Sanxenxo un "máximo histórico" durante o mes de agosto, coincidindo co paso da Volta pola provincia.

O obxectivo da Deputación e da secretaría xeral para o Turismo é que este efecto se volva repetir este ano, axudando, ademais, a prolongar a tempada alta, xa que a proba ciclista estará na provincia os días 11 e 12 de setembro.

Neste sentido o presidente da Deputación incidiu en que serán entre 33 e 35 os concellos polos que pasará e que será un "magnífico escaparate" para mostrarlle ó mundo os atractivos turísticos.

A penúltima etapa da Volta a España partirá do Castelo de Salvaterra de Miño, percorrendo Ponteareas e boa parte dos concellos do Condado, ademais de Baiona, Nigrán e Gondomar, para introducirse posteriormente na península do Morrazo, onde probablemente faga un dobre pase polo municipio de Moaña antes de rematar en Cangas.

Previamente, o día 11 de setembro, serán as comarcas de Tabeirós-Terra de Montes, Caldas e O Salnés as que reciban o pelotón da Volta, nunha etapa que se iniciará na Estrada e que culminará no campo de golf de Meis, "a cabalo entre dúas rías, a de Arousa e a de Pontevedra". Un remate en subida que, segundo subliñou o presidente da Deputación, a propia organización considerou "especialmente atractivo".

Neste caso e a falta de pechar algúns detalles, a etapa pasará por Cuntis, Caldas de Reis, Moraña, Valga, Pontecesures, Vilagarcía de Arousa, Cambados, Sanxenxo e outros concellos do Salnés e Pontevedra, proxectando a máis de 190 países do mundo a imaxe dunha provincia e dunha comunidade que quere apostar forte polo turismo como sector estratéxico.

Turismo interior e diversificación

O alcalde de Cangas, José Enrique Sotelo, valorou a aposta da Deputación por este evento deportivo e subliñou que para a vila morracense se presenta como unha posibilidade de "reducir a nosa dependencia da pesca" e para a revalorización turística dun concello que é o que máis quilómetros de costa ten de toda Galicia.

Sotelo incidiu en que o municipio é "o gran descoñecido de Galicia para o turismo", pero o obxectivo é reverter esta situación de forma que o sector cobre no concello o peso que se merece.

De feito, tal e como subliñou o rexedor local, na actualidade hai en marcha cuatro proxectos turísticos na localidade: a rehabilitación con fins turísticos da conserveira Ameixide, no Hío, que contará con spa, hotel e un pequeno porto deportivo; unha escola de vela privada e outros dous establecementos hoteleiros.

O alcalde confía en que a chegada da Volta actuará, así, a modo de revulsivo económico e de elemento de promoción da vila, que ten tamén un grande atractivo no seu conxunto histórico, no que se realizaron xa destacadas actuacións de rehabilitación e urbanización por parte da Deputación.

Pola súa banda, a tenente de alcalde de Salvaterra de Miño, Marta Valcárcel, salientou o auxe do turismo de interior e incidiu en que a proba ciclista será un bo colofón á Festa do Viño do Condado, que rematará nos días previos á chegada deste evento deportivo á localidade.

Marta Valcárcel subliñou a importancia que para concellos pequenos como no que desenvolve o seu labor ten o apoio doutras administracións para a súa promoción turística e deixou patente a relevancia do ciclismo na comarca do Condado.