Despois de descansar na primeira xornada de competición da Adecco Plata Cambados prepara xa a súa histórica estrea na categoría de bronce do baloncesto español.
O Pombal vestirase de gala o próximo sábado (18:00 horas) para recibir un dos favoritos ao ascenso, o Palma Air Europa, segundo clasificado da liga regular o pasado ano e primeiro líder despois de arrastrar o Askatunak en Mallorca (98-66).
Unha estrea de altura a o que o Club Xuventude Conservas de Cambados chega coa moral alta despois de protagonizar unha notable pretempada, na que os de Yago Casal venceron seis encontros e só caeron, nun choque moi axustado, ante un equipo de superior categoría como o COB Ourense (65-68) na Copa Galicia.
O equipo amarelo confiará para esta tempada no bloque que destacou a pasada campaña en EBA. Repiten ata nove xogadores aos que se sumaron un par de reforzos, entre os que destaca o senegalés Mbagne, cedido polo Obradoiro.
A boa acollida da campaña de socios posta en marcha polo Xuven, con máis de 600 carnés retirados, asegura un grande ambiente para este esperado debut.
No hay comentarios:
Publicar un comentario
NON SE PUBLICARÁN COMENTARIOS ANÓNIMOS. SI O COMENTARISTA QUERE PERMANECER NO ANONIMATO, NON SE PUBLICARÁ O NOME.