O PROXECTO VIÑAS ATLANTICAS: UN NOVO SERVICIO PARA OS VITICULTORES

Os viticultores do Salnés poderán acceder aos boletíns de alerta de risco de mildiu que estarán dispoñibles na páxina web de Viñas Atlánticas. Trátase dun proxecto do Servizo de Medio Ambiente da Deputación de Pontevedra que permite obter información en tempo real sobre as enfermidades da viña, como o mildiu, para controlar a aplicación dos tratamentos, reducir o uso de produtos fitosanitarios e optimizar o tempo e os recursos económicos dos produtores.

Este sistema de detección e aviso, que funciona por medio de diversas estacións meteorolóxicas e dunha rede de sensores instalados nos viñedos, xa o viñan utilizando de xeito experimental os socios que participaban no proxecto ambiental LIFE Viñas Atlánticas: as adegas Martín Códax e Condes de Albarei, e a Cooperativa Vitivinícola Arousá.

Os boletíns de aviso fitosanitario, que empezaron a emitirse o pasado mes de xuño, non só están enfocados a advertir sobre o risco de aparición de mildiu e outros males como oidium ou botrytis, a curto e medio prazo, senón que tamén lles proporcionan aos viticultores unha estratexia xeral sobre o tratamento adecuado e os días máis recomendables para aplicar os produtos fitosanitarios nos viñedos.

ALERTA

Os técnicos de Viñas Atlánticas preveñen aos produtores para que estean alerta e visiten con frecuencia as parcelas, especialmente debido a que a finais desta semana prevese un "certo incremento da humidade". Só no caso de que haxa síntomas de enfermidade nas vides habería que actuar "de forma inmediata", polo que, a curto prazo, o sistema de alertas non aconsella a aplicación de tratamentos.

Como "estratexia xeral", Viñas Atlánticas recomenda cambiar o principio activo do tratamento polo menos cada tres aplicacións, para evitar que o fungo que provoca o mildiu desenvolva resistencia ao tratamento, o que dificultaría o control da praga.

VITICULTURA INTELIXENTE

A Deputación de Pontevedra cualifica Viñas Atlánticas como un proxecto "innovador e de investigación" que, coa achega dos axentes implicados, "converteuse no primeiro de viticultura intelixente de España".

A iniciativa, que se financia con fondos europeos e actualmente atópase "en pleno desenvolvemento", xurdiu co obxectivo de demostrar "a necesidade e viabilidade da produción de viño sostible nos viñedos da Denominación de Orixe Rías Baixas", minimizando o uso de produtos químicos na comarca do Salnés, onde se atopa unha gran porcentaxe de adegas e viticultores adscritos a esta marca.

Os socios das adegas que forman parte do proxecto Viñas Atlánticas xa dispoñen, desde hai meses, dun "libro de explotación electrónico" co que se lles facilitan os trámites tanto son as súas adegas, como cos organismos do sector. Ademais, manexan unha aplicación informática que lles permite xestionar a súa explotación "de xeito áxil e fácil".