DEMANDA CIVIL CONTRA NOVAGALICIA BANCO

A Fiscalía Superior de Galicia presentou esta mañá ante o decanato dos xulgados da Coruña a demanda civil de acción colectiva contra Novagalicia Banco polas participacións preferentes e obrigacións subordinadas perpetuas.

 Fontes da Fiscalía explicaron que o contido da demanda, que supera os 50 folios, será dado a coñecer o vindeiro venres polo fiscal superior, Carlos Varela.

A presentación da demanda atrasouse algúns días respecto das previsións iniciais, que apuntaban a finais de xuño, tendo en conta do volume de contratos recibidos, dos cales ata 1.700 incorporáronse á mesma.

Na elaboración da demanda civil analizáronse os contratos achegados polo Instituto Galego de Consumo, pola Fiscalía de Pontevedra, que abriu dilixencias informativas o pasado mes de febreiro, e pola Asociación de Consumidores de Banca (Adicae).

Hai dous anos, a Fiscalía Xeral do Estado remitiu un decreto a todas as fiscalías para que se acudisen en materia de consumo cando se vise afectado un "colectivo amplo" de persoas, como é o caso das participacións preferentes. Nesta acción xudicial solicitarase a nulidade das "cláusulas abusivas" contra os consumidores de preferentes e subordinadas, en total, 43.000 clientes con participacións preferentes e obrigacións subordinadas perpetuas, por un volume total de 961.598.475 millóns de euros.

O banco galego segue á espera da autorización de Bruxelas para poder aprobar calquera solución diferente do pago ao prezo do mercado actual, unha saída insatisfactoria para os afectados por ser o seu valor moi baixo.

Os afectados por estes produtos en Galicia que os contrataron noutras entidades financeiras deberán dirixirse á Fiscalía Xeral do Estado, apuntan as fontes do Superior de Galicia.