DE NOVO PROXECTO COMÚN A ANOVA-IRMANDADE NACIONALISTA

Os asembleístas que participaron este sábado na constitución dun novo referente nacionalista aprobaron a súa nova denominación, ANOVA-Irmandade Nacionalista, unha das cuestións que figuraba na orde do día desta asemblea constituínte na que participan asembleas de base e tamén destacados nomes do Encontro Irmandiño, como o histórico Xosé Manuel Beiras ou o alcalde de Teo, Martiño Noriega.

A asemblea de ANOVA-Irmandade Nacionalista aprobou o seu documento político co 96,5 por cento dos votos na súa sesión constituínte --celebrada en Santiago--, tras un tenso debate que se prolongou durante este sábado con numerosas peticións de palabra, entre as que houbo dúas intervencións destacadas do histórico dirixente nacionalista Xosé Manuel Beiras.

O documento político incorporou ao longo do debate distintas emendas centradas en cuestións como o maior control por parte dos cargos desta organización política e os pactos electorais.

Tamén se aprobou a súa coordinadora nacional, na que están, entre os 75 nomes, o histórico nacionalista Xosé Manuel Beiras, ou o alcalde de Teo, Martiño Noriega, ambos, moi ovacionados ao subir á tarima antes de clausúraa do acto, que concluíu con arengas chamando á "independencia".

Durante o transcurso da asemblea, á que acudiron uns mil asambleistas dos inscritos, viviuse algún momento de tensión con asistentes visiblemente enfadados coa organización do debate, debido a que a mesa decidiu suprimir quendas de palabra porque a discusión prolongábase moi por encima do horario previsto.