O PSdeG PIDE COBRAR O I.B.I. A IGREXA AOS SEUS ALCALDES

O secretario xeral do PSdeG, Pachi Vázquez, sinalou fai uns dias que a dirección socialista "ten moi claro" que, "sen excepción" os alcaldes do seu partido deben aplicar o Imposto de Bens Inmobles á Igrexa nas zonas que non son de culto.

 

Pachi Vázquez sostivo, en declaracións aos xornalistas, que en momentos onde a solidariedade é necesaria e "todos debemos apertar o cinto", a Igrexa "ten que ser a primeira que dea exemplo, e creo que todos os gobernos socialistas, sen excepción, deben aplicar o IBI".

 

 

 

Preguntado pola postura de alcaldes socialistas, entre eles o de Vigo, Abel Caballero, de non solicitar o pago á Igrexa, Pachi Vázquez indicou que  "os socialistas non somos unha organización militar".       

 

Explicou, con todo, que a dirección do partido pide que se aplique o IBI á Igrexa "sen excepción" e, máis aló "de que é opinable calquera razoamento, se en toda España a dirección do partido e en Galicia a dirección está a apostar por unha decisión, deberiamos tratar de aceptala todos".

 

Casa rectoral.

 

"A dirección política deste partido, Madrid e Galicia, téñeno moi claro e defendemos absolutamente e con rotundidade" esta decisión, sinalou.