JOHN RADFORD VISITARA CAMBADOS POLO ALBARIÑO

O gurú británico da gastronomía coñece Cambados e apreza o viño albariño.

O alcalde de Cambados, Luis Aragunde, mantivo unha entrevista co escritor e xornalista británico John Radford, considerado un dos grandes críticos do mundo do viño e da gastronomía no Reino Unido. Aragunde aproveitou esta xuntanza profesional para convidalo a coñecer a Festa do Albariño que este ano alcanza a súa edición número 60, e tamén para amosarlle en profundidade as excelencias da gastronomía cambadesa e máis o sector do viño no Salnés.

 John Radford, que obtivo varios premios por publicacións sobre viño e gastronomía, xa coñeceu Cambados nalgunha visita anterior, onde se ratificou no aprezo as calidades do albariño, e participou tamén en actividades organizadas polo consello regulador da denominación de orixe Rías Baixas.

Luis Aragunde e John Radford coincidiron esta pasada fin de semana no acto de irmanamento entre a Cofradía de los Vinos de Ribera del Duero e o Capítulo Serenísimo do Albariño, que se celebrou na vila vallisoletana de Peñafiel e que deberá ser ratificado durante a Festa do Albariño, na primeira semana de agosto.

 Precisamente, o Capítulo Serenísimo apadriñara hai uns anos a constitución da confraría dos viños da denominación Ribera del Duero.

 

John Radford leva máis de 35 anos escribindo e comentando sobre viños en programas radiofónicos do Reino Unido. Acadou numerosos premios e publicou preto de vinte volumes sobre viños europeos en xeral e españois en particular. O seu libro máis recente de cociña titúlase España, Bebe España, escrito en colaboración co recoñecido chef Mario Sandoval.