14.367 EMPREGOS MENOS NA BANCA

Os bancos e caixas de aforros que operan en España reduciron o seu persoal en 14.367 empregados o pasado ano e pecharon 2.905 sucursais, principalmente debido ao proceso de reestruturación do sector.

Ao peche de 2011, as entidades financeiras españolas contaban con 223.492 empregados, 107.492 en bancos e 116.000 en caixas, segundo os datos da Asociación Española de Banca (AEB) e a Confederación Española de Caixas de Aforros (CECA).

Isto supón 14.367 empregos menos que ao peche de 2010, cando contaban con 237.859, e o maior axuste corresponde ás caixas, responsables de eliminar 12.165 destes postos de traballo

Polo que respecta ás sucursais, ao peche de 2011 ascendían a 35.118, 2.905 menos que un ano antes. Os bancos contaban o pasado ano con 14.331 sucursais, 387 menos que o ano anterior, principalmente debido ás 135 oficinas que pechou Banco Guipuscoano, as 128 de Barclays, as 46 de Banesto, as 45 de Banco Sabadell, as 30 de Banco Pastor e as 20 de Banca March.

As caixas, pola súa banda, pecharon 2.518 oficinas, co que ao finalizar 2011 contaban con 20.787 sucursais. Desde UXT apuntan que a supresión de empregos e o peche de oficinas débese "sobre todo" ao proceso de reestruturación das antigas caixas de aforros, xa que ao agruparse prescindiuse de numerosas sucursais.
       
O sindicato insiste na necesidade de atopar "solucións non traumáticas" para esta reestruturación, é dicir, que o proceso se realice mediante o acordo entre as empresas e os traballadores.

Neste punto coincide o secretario xeral de Comfia-CCOO, José María Martínez, quen esixe que a reestruturación se faga "como ata agora", con acordo "social".

As perdas de emprego seguen a tendencia dos últimos anos, como recorda Martínez, que estima que o sector financeiro suprimiu 30.000 postos de traballo desde que empezou a crise, a metade debida á caída do negocio e a outra metade á reestruturación do sector.

Ademais, os sindicatos apuntan que esta tendencia vai en aumento. UXT calcula que, só coas medidas que xa foron anunciadas, 2012 terminará con 2.900 oficinas e 13.200 traballadores menos, "unha reestruturación moi forte porque é un período curto de tempo".

Desde CC OO non ofrecen datos de previsións, pero advirten de que os axustes que se fagan a partir de agora "van depender das condicións que poña Europa ao préstamo" que vai conceder ás entidades financeiras españolas para a súa recapitalización.

Nese sentido, Martínez pide "que se limpen de incerteza palabras tan grosas como liquidación", no sentido de que isto pode implicar a absorción dunhas entidades por outras e non necesariamente a súa eliminación.

De cara ao futuro, UXT avoga pola creación dunha "banca pública" coas catro entidades auxiliadas polo Estado (Banco de Valencia, Catalunya Banc, Novacaixagalicia e Bankia), porque
despexaría a incerteza sobre o seu futuro, permitiría que fluíse o crédito e evitaría "que a xente acabe levando os depósitos".

A continuación achégase un cadro co número de sucursais e empregados das entidades financeiras españolas, desglosado por bancos e caixas, no ano 2010 e 2011, así como a diferenza entre ambos.
       
                                   2011              2010       Diferenza
       ----------------------------------------------------------------------------
       Sucursais         35.118            38.023           -2.905
       -Bancos            14.331            14.718             -387
       -Caixas             20.787            23.305           -2.518
       
       Empregados    223.492           237.859          -14.367
       -Bancos           107.492           109.694           -2.202
       -Caixas            116.000           128.165          -12.165