EXITO TOTAL DO FESTIVAL DO NORTE

Máis de 18.000 persoas pasaron entre a noite do venres e do sábado polo recinto de Fexdega, en Vilagarcía, para presenciar os concertos programados dentro do Festival do Norte. Os datos foron valorados onte polos organizadores deste certame de música indie. Un deles, Toño Caneda, foi contundente á hora de analizar os datos: «Nin a crise puido connosco».

A clave do éxito cultivado radica, segundo Caneda, no esforzo realizado para configurar «un cartel moi popular», no que destacaban Love of Lesbian na primeira xornada, e Fangoria na segunda. Pero o sábado, tamén deu a badalada Nancys Louras, un grupo que fixo que, ás oito da tarde, «a carpa pequena quedase pequena» para acoller á lexión de fans que acudiron a escoitar a esta formación.

Pero se o festival foi un éxito foi tanto grazas ao cartel como ao bo ambiente que reinou no recinto durante as dúas xornadas de concertos. Entre o público había xente de todas as idades, que chegaban atraídos por unhas ou por outras bandas. Fangoria, que puxo sobre o escenario un espectáculo con certo toque a cabaret, foi a guinda perfecta para o certame.