DOMINGOS E FESTIVOS NOS QUE AS CADEAS E GRANDES SUPERFICIES COMERCIAIS PODERÁN ABRIR NO 2019

Como cada ano, trátase de dez días que foron consultados pola Xunta coas principais organizacións do comercio galego e dos consumidores

Serán o 13 de xaneiro, o 18 de abril (Xoves Santo), o 30 de xuño, o 12 de outubro (Día da Hispanidade), o 1 de novembro (Todos os Santos), e todos os domingos de decembro

Estas datas non son de aplicación para o pequeno comercio, xa que este goza de liberdade horaria

Os concellos poden solicitar ata o 15 de novembro a modificación de ata dúas destas datas para adaptalas ás súas características

A Consellería de Economía, Emprego e Industria publica hoxe no Diario Oficial de Galicia (DOG), os domingos e festivos nos que os establecementos comerciais que non gozan de liberdade horaria poderán abrir ao longo do vindeiro ano 2019.

Logo da consulta previa ás principais organizacións do sector, ao Consello Galego de Consumidores e Usuarios e ao Consello Galego de Cámaras, os días de apertura, que tal e como marca a normativa son dez cada ano, repártense do seguinte xeito: o 13 de xaneiro, primeiro domingo trala data tradicional de inicio das rebaixas de inverno; o 18 de abril, Xoves Santo; o 30 de xuño, domingo previo á data habitual de comezo das rebaixas de verán; o 12 de outubro, Día da Hispanidade; o 1 de novembro, Todos os Santos; e todos os domingos de decembro, que se corresponden cos días 1, 8, 15, 22 e 29.

Calquera concello que o estime oportuno poderá solicitar ata o próximo 15 de novembro a modificación de ata dúas datas para o seu termo municipal para adaptalo aos festivos locais ou atendendo a calquera outra circunstancia motivada.

Cómpre sinalar que estes domingos e festivos non son de aplicación para o pequeno comercio, xa que, con carácter xeral, poden decidir libremente o seu horario e días de apertura os establecementos de ata 300 metros cadrados, coa excepción dos que non teñan a consideración de pequena e mediana empresa.