BÚSCANSE FAMILIARES DE JOSÉ CORES GALIÑANES

Hai uns días chegaba a nos unha mensaxe de María Torres de Vigo, neta e biznieta de republicanos, escritora, poeta, memorialista, e investigadora histórica.

Esta muller está levando a cabo unha investigación para un libro sobre os vigueses que participaron na II Guerra Mundial (exiliados, deportados, combatentes, resistentes, mariños, espías...) e querría contactar con familiares de todos os homes e mulleres que van aparecendo ao longo da sua investigación. Empezou con trece e xa pasan dos corenta.

Ao longo das súas investigacións apareceu o nome de José Cores Galiñanes, nacido en Cambados e veciño de Vigo. Mariño republiano durante a Guerra civil española. 

José Cores Galiñanes naceu en Cambados pero trasladouse a Vigo (Rúa Real) Era mariño e na guerra estivo na frota republicana. En marzo de 1939 chegou ao Norte de África e logo viviu en Moscova.

Outro dato que se atopou é que os seus pais chamábanse José e Peregrina.
Por un sumario do Arquivo Naval de Ferrol sábese que a nai de José chamábase PEREGRINA GALIÑANES GARCÍA. En 1936 tiña 47 anos e estaba xa viúva. Era natural e veciña de Cambados. Xornaleira de profesión.

Tamén se  atopou o nome dunha muller con idénticos apelidos pero non hai certeza de que esta muller falecida hai uns meses puidera ser irmá de José, o seu nome era Luzdivina Cores Galiñanes

Agradeceríase calquer información que puidera facilitar o atopar a familiares de José. Calquer información pódese mandar por mensaxe á páxina do Facebook "CORES DE CAMBADOS" ou ben comentando debaixo deste artigo.

A REPÚBLICA E O GALEGUISMO 1936 CONFERENCIA DEBATE ESTE SÁBADO

Cando trascorreron 80 anos dos feitos acontecidos en 1936, son aínda moitas as lagoas, os decoñecementos, os tópicos e as manipulacións pendentes de revisión. O período republicano e as súas relacións co galeguismo organizado, as causas e consecuencias daquel período histórico, as diferenzas entre o que pasou en Cambados e no Grove, dúas vilas veciñas pero absolutamente diferentes, e as actitudes políticas dos diferentes protagonistas van ter na capital do Salnés, unha xornada de debate. O dereito a saber, a liberdade de investigar, nun acto organizado pola Concellería de Cultura de Cambados e no que participan Carlos Méixome, historiador; Jacobo Domínguez, profesor e investigador do período republicano en Cambados e Antón Mascato, editor e investigador da memoria do Grove.

O acto, o primeiro doutros que virán nos meses seguintes, desenvolverase o sábado, día 9, ás 19 horas, en Exposalnés, presentado polo Concelleiro de cultura, Víctor Caamaño, quen afirmou que "o coñecemento da Historia, o dereito a estudala e documentala e o deber de divulgala, debe presidir a actitude de calquera responsable cultural con responsabilidades públicas" 

Na foto do cartel, pode verse a Emiliano López, en Cambados en 1936, do corpo de Carabineiros, que se mantivo leal á República e foi depurado ata a extinción polo réxime franquista. Este corpo tiña como función principal a da vixiancia das aduanas e o servizo de represión do estraperlo. O fotografado era ademáis o home de María López que tiña fonda en Fefiñáns e que destacou pola atención clandestina aos presos que ían chegando ao Cárcere de Cambados da que tiña a encomenda do servizo alimentario de gardas civís, militares e funcionarios de prisións.