UNHA MULLER FERIDA NUN ACCIDENTE EN VILANOVA

Ferida unha condutora tras saírse da vía en Vilanova de Arousa O accidente tivo lugar na estrada VG-4.3, sobre o punto quilométrico 4. A muller foi trasladada ao Hospital do Salnés A condutora dun vehículo foi trasladada despois de sufrir unha saída de vía na mañá deste venres no concello pontevedrés de Vilanova de Arousa. Segundo informou o 112 Galicia, este accidente tivo lugar sobre as 11:00 horas deste venres. Foi unha persoa testemuña do feito a que avisou de que un vehículo tivera un sinistro na estrada VG-4.3., sobre o punto quilométrico 4, e solicitaba asistencia médica para a condutora do turismo. Por iso, os operadores do CIAE-112 comunicáronlle os datos recolleitos aos servizos sanitarios, á Garda Civil de Tráfico e Policía Local, así como aos Bombeiros de Ribadumia e á Agrupación de Voluntarios de Protección Civil da localidade. Unha vez no lugar do sinistro, os membros de Protección Civil de Vilanova confirmáronlle ao 112 que a persoa afectada no accidente fora trasladada ao Hospital do Salnés. En concreto, indicaron desde Emerxencias do Concello de Cambados que participaron no dispositivo, , o 061 enviou ao lugar do sinistro unha ambulancia de soporte vital básico e un equipo sanitario de Atención Primaria de Cambados para atender á persoa ferida, que foi trasladada ao Hospital do Salnés. Ademais, para garantir e restablecer a seguridade na vía, por parte do Centro de Atención ás Emerxencias de Galicia tamén se informou ao Centro de Xestión de Tráfico e ao persoal de mantemento de estradas.