UNHA PARELLA DE XUBILADOS DO SALNÉS DETIDA CON 450 QUILOS DE HAXIX

Unha parella galega de xubilados foi detida en Oviedo con máis de 450 quilos de haxix nunha autocaravana, no marco da operación Bodorrio que desarticulou a unha organización dedicada ao transporte e distribución de estupefacientes polo norte do país.

Segundo informa a Policía Nacional nun comunicado, deste xeito dáse por neutralizado a un armazón delituoso asentado en Galicia tras máis dun ano de investigación. O operativo tivo lugar á primeira hora da mañá do 16 de decembro, cando axentes da Udyco da Comisaría Provincial de Pontevedra e do grupo de estupefacientes de Oviedo interceptaron un vehículo conducido pola parella investigada na autovía A-8 ao seu paso pola capital asturiana. O haxix localizouse nunha caleta situada na parte traseira dunha autocaravana conducida por esta parella de avanzada idade, naturais de Vilanova e Vilagarcía de Arousa (Pontevedra), que "se facía pasar por turistas". A organización contaba con varios vehículos habilitados para o transporte dos narcóticos que eran utilizados pola parella. Viaxaban desde a comarca do Salnés a comunidades como Asturias, Cantabria e País Vasco para distribuír a droga. Os axentes levaron a cabo un rexistro posterior no domicilio dos detidos, en Vilagarcía de Arousa, no que se interviñeron entre outros efectos: 14.000 euros en efectivo escondidos nun armario, unha carabina do calibre 22 (da marca Walter G22), 147 cartuchos do mesmo calibre, sete cartuchos do calibre 9 curto e cinco teléfonos móbiles. Os detidos foron postos ao dispor da titular do Xulgado de Instrución número 3 de Oviedo. A operación continúa aberta e non se descartan novas detencións.