ARRANCA BEN A SEMANA, BAIXA O NÚMERO DE ENFERMOS

Coronavirus Galicia: 286 contaxios novos e baixan a 5.596 os casos activos Galicia rexistra menos contaxios que o luns pasado e volven baixar os casos activos. A situación é moi similar a hai xusto unha semana. Galicia comeza a semana con menos contaxios que o luns pasado, 286 fronte aos 371 de fai sete días, e cun novo descenso de casos activos. A situación da pandemia na comunidade é moi similar á do luns pasado: hai 36 infectados máis e 9 pacientes de COVID-19 menos nos hospitais. Hoxe hai poucas variacións nas áreas sanitarias, destacando a notable mellora de Ferrol, que Pontevedra baixa en casos activos e que Santiago segue aumentando e está preto de converterse na área máis afectada de Galicia. Hoxe luns son 85 diagnósticos menos que fai sete días, procedendo dun número bastante menor de probas. Os 286 casos novos de hoxe son o 4,17% de diagnósticos positivos de 6.857 probas PCR, mentres que os 371 do luns pasado eran o 4,61% de positivos de 8.040 tests. Na web de datos do Sergas di que nas últimas 24 horas confirmáronse 268 casos de COVID-19 por PCR, pero a diferenza entre o total de infectados desde o inicio da pandemia de hoxe (59.358) e o de onte (59.072) é de 286 persoas. Do mesmo xeito, os novos contaxios por área sanitaria calcúlanse co mesmo procedemento. Nas últimas 24 horas rexistráronse en Galicia 286 novos casos de SARS- CoV-2, 3 falecementos e 296 altas, o que fai que baixen en 13 persoas os casos de coronavirus, pasando dos 5.609 de onte aos 5.596 de hoxe. O total de hospitalizados aumenta en 8 persoas, de 346 a 354 pacientes. O pasado luns eran 365 hospitalizados, 11 máis que hoxe. O total de casos de coronavirus contabilizados polo Sergas desde o inicio da pandemia é de 59.358. Ferrol segue mellorando A área sanitaria máis afectada da comunidade segue sendo Vigo con 1.246 casos activos (+3), seguida cada vez máis de preto por Santiago de Compostela con 1.235 casos (+19), Pontevedra con 917 (-19), A Coruña con 882 (-5), Ourense con 489 (+19), Ferrol con 458 (-28) e Lugo con 369 (-2). Novos contaxios por área sanitaria A Coruña: 53 Ferrol: 13 Lugo: 17 Ourense: 44 Pontevedra: 26 Santiago: 64 Vigo: 69 Total: 286

O total de falecementos desde o inicio da pandemia alcanza as 1.341 persoas, 3 máis nas últimas 24 horas, e son xa 722 nesta segunda onda, superando os 619 da primeira. O total de hospitalizados é de 354 (+8), divididos en 53 (=) na UCI e 301 (+8) en unidades de hospitalización. O total de probas PCR realizadas é de 1.045.856, delas 6.857 nas últimas 24 horas, cun 4,17% de positivos.  

Esta semana comezou mellor que a anterior, con 286 casos novos fronte aos 371 do luns da pasada. A semana que terminou onte producíronse 2.611 contaxios de coronavirus, 352 máis que os 2.259 da semana anterior.