ASTILLEROS "ACHA" DE CAMBADOS CONSTRÚE UN BARCO ELÉCTRICO

Percorridos marítimos e fluviais pola natureza, sen ruídos desagradables que rompan a maxia e causando un mínimo dano á contorna. Isto é o que ofrece Xouva 4.90, un barco de paseo, con capacidade para oito persoas, deseñado polo enxeñeiro galego José Ballester que xa constitúe todo un exemplo de transporte ao servizo do turismo máis ecolóxico. Do mesmo xeito que quen construíu o Titanic, o impulsor de Xouva define á súa creación como “ insumerxible” aínda que, neste caso e segundo as súas palabras, é certo e está probado. “Aínda que se asolaguen todas as cámaras, o barco segue flotando”, explica Ballester, que resta importancia a esa característica para recalcar que, o realmente relevante do vehículo, é o que o impulsa. “Hai moitos barcos deste tamaño que son insumerxibles, pero non moitos que sexan eléctricos. No mercado español, Xouva é o único”, apunta o enxeñeiro, que comezou esta aventura empresarial no ano 2018. Polo momento, Ballester vendeu xa tres barcos, todos saídos de Astilleros Acha, de Cambados. Dous deles realizan roteiros de ecoturismo por Galicia e un está dispoñible para que o aluguen particulares na illa canaria de Lanzarote. A primeira Xouva que funcionou como recurso turístico é a que, desde o municipio coruñés de Sada, realiza percorridos guiados polo río Mandeo e por outros leitos e costas da comarca. “Realiza roteiros polo Mandeo, ata Betanzos. É unha zona protexida e reserva da biosfera. Tamén fai roteiros por Ares, Pontedeume… chegando mesmo ata o parque natural das Fragas do Eume”, informa o creador de Xouva. O segundo dos barcos tivo como destino a provincia de Ourense, onde completa percorridos polas paraxes próximas a Castrelo de Miño, Arnoia e Ribadavia. “Está vinculado aos balnearios de Caldaria e á Denominación de Orixe Ribeiro. Completa a oferta de Ourense en turismo termal e enoturismo”, expón Ballester. Máis lonxe foi a parar a terceira Xouva que xa está operativa. As praias da illa de Lanzarote son o seu campo de actividade, que presenta diferenzas coa das súas irmás que quedaron en Galicia. “Alúgase sen patrón, para dar unha volta pola costa. Quen a aluga toman o sol, báñanse no mar… Concorda máis co que se entende por lecer náutico”, comenta o emprendedor galego. Compromiso coa ecoloxía e a inclusión “Para min, o máis importante do barco é o feito de que sexa eléctrico, porque é o que fai que a pegada da actividade turística que realiza sexa practicamente nula. Ademais, a contaminación non é só pola emisión de partículas da combustión, senón tamén polo ruído. Dáse por sentado que un barco fai ruído e, por iso, unha das maiores sorpresas de quen vai na Xouva é o silencio”. Con esta frase remarca o fundador de Xouva o importante que é para el a sustentabilidade e o respecto ao medio ambiente. A ausencia de ruído, ademais de evitar perturbacións para a fauna, fai que a experiencia a bordo sexa máis gratificante. “É moito máis confortable, porque os tripulantes están máis metidos na natureza”, destaca Ballester.
Xouva é tamén unha embarcación adecuada para persoas con mobilidade reducida, o que, como conta o seu creador, concrétase no seu propio deseño. “Quero ofrecer un turismo eco, pero tamén inclusivo. Son dous valores que en terra son xa practicamente obrigatorios. A popa é plana e aberta, a diferenza dos barcos que teñen forma de bañeira. Isto é bo, non só para os usuarios de cadeiras de rodas, senón tamén para nenos, para maiores e para moitas outras persoas con mobilidade limitada”, relata.  

Aínda que quere ir “con calma”, Ballester planea que, nun futuro non moi afastado, o seu Xouva estea presente noutros lugares de España e mesmo de Europa. “Primeiro, sairemos ao resto de España, que ten moitas zonas onde o barco pode funcionar. Logo xa sairemos a Europa, que é un mercado que xa existe”, avanza.