BAIXA O NÚMERO DE POSITIVOS POR COVID POLA BAIXA DE PROBAS PCR FEITAS

Os novos casos de coronavirus en Galicia, con datos ofrecidos polo Sergas ata as 18.00 horas do luns 12 de outubro, reflicten unha gran baixada no número de positivos rexistrados, que chega a 238, 70 menos que o dato do luns. O que si sobe é o número de casos activos, isto é, o número de persoas que permanecen enfermas, con 4.514, 40 máis. Hai 199 altas máis, ata chegar ás 22.123. Faleceron, con datos aínda notificados o luns, 786 persoas, e contaxiáronse 27.423.

O número de probas volven baixar: durante as últimas horas fixéronse 3.383 probas, mentres que o luns o dato achegado foi 4.440, lonxe das preto de 6.000 anunciadas o sábado. Practicáronse 556.927 PCR. O que volve subir é a positividade das mesmas, é dicir, a porcentaxe do total que resultan positivas: chega ao 8,4%, nove décimas máis que o dato do luns e o segundo máis alto da segunda onda, que o 13 de setembro alcanzou unha positividade do 9,1%. Na área de Ourense a positividade dispárase tres puntos ata o 14,6% das probas positivas, o cuarto número máis alto da segunda onda. O dato volve ser malo na provincia de Ourense, que conforma unha única área sanitaria. Alí a cifra de novos positivos é de 95, 20 máis que os 75 do domingo e 9 máis que os 86 do sábado. É case o 40% dos positivos novos en toda a Comunidade, e a provincia aglutina o 35% dos casos activos actuais. Hai 72 persoas ingresadas en planta e 11 en UCI. A área que si se relaxa despois do gran número de PCR positivas é a de Santiago. Dos 72 positivos comunicados o luns pásase aos 34 confirmados este martes, 38 menos. Tamén seis menos que os comunicados o domingo. Hai 33 persoas ingresadas e outras sete máis na UCI, e contan con 624 casos activos (+3). No resto de áreas localizáronse as seguintes cifras de positivos: na da Coruña foron 14, 52 menos que o luns, na de Ferrol 6, 15 menos, na de Lugo foron 26, nove menos, na de Pontevedra, 23, tres menos, e en Vigo 40, 16 máis. En canto aos casos activos, é dicir, os positivos actuais, os datos están da seguinte maneira: soben as áreas de Ourense, neste caso aos 1.567 (+55), a de Vigo, que ten 496 (+29 máis), a de Lugo, que conta con 477 (17 máis) e Santiago, que se sitúa en 621 (+3). Os casos activos retroceden nas áreas da Coruña ata os 745 (-21), Pontevedra, cun gran retroceso de 42 positivos, ata os 469 e na de Ferrol que baixa aos 136, (-1). Botando unha ollada á presión hospitalaria, as UCI galega chegan a 40 pacientes, un máis que os notificados o luns. As camas de planta contan con 14 enfermos máis de Covid, un total de 212 (+14).