AS RESTRICIÓNS NON FREAN AÍNDA A COVID E OS CONTAXIOS SOBEN A 346

Galicia non logra dobregar de momento a curva do coronavirus a pesar das restricións. Os últimos datos facilitados polo Sergas (actualizados ás 18.00 horas do xoves) mostran un repunte dos contaxios. En 24 horas detectáronse 346 novos casos fronte aos 233 do mércores e os 254 do martes. O número de pacientes totais que atravesan a enfermidade nestes momentos, os denominados casos activos, tamén se incrementan. Son xa 4.680 persoas. O pico de activos na primeira onda produciuse o pasado 8 de abril cando se rexistraron 5.481 casos.

Se o mércores os datos ofrecían un pequeno respiro na área sanitaria de Ourense, a máis afectada e a que conta con máis concellos con restricións, o xoves as cifras de positivos volvían subir. En 24 horas diagnosticáronse 81 novos casos que deixan a cifra total de activos en 1.601, unha de cada tres persoas con coronavirus en Galicia reside na provincia. Outro municipio sobre o que se vixía atentamente o avance do virus é o de Santiago de Compostela. Na súa área sanitaria os números seguen empeorando. Suma 60 contaxios (23 máis que a xornada previa) e os seus casos activos soben a 660. Salvo en Pontevedra onde o número de persoas que atravesan o coronavirus descende ata os 401 a pesar de rexistrar 31 novos casos, o impacto do covid increméntase en todas as áreas sanitarias. En Coruña detectáronse 57 novos positivos e conta xa con 784 activos; en Ferrol houbo 19 contaxios que elevan a cifra de persoas con coronavirus ata os 167; en Lugo rexistráronse 30 novos casos e xa son 475 os pacientes que tratan de superar a enfermidade e en Vigo localizáronse 68 contaxios co que os seus casos activos chegan aos 592. A pesar de que as cifras de contaxios son parecidas na primeira e a segunda onda, o impacto do coronavirus na presión hospitalaria está a ser máis limitado. Aínda así, as hospitalizacións incrementáronse na última xornada. En planta hai 8 persoas máis ingresadas, un total de 231. Nas UCI tratan de recuperarse agora 41 persoas, unha menos que o día anterior. O pasado día 6 de abril, as UCI dos hospitais galegos trataban a un total de 168 pacientes. Nos momentos máis duros do confinamento, Galicia tivo que incrementar a súa capacidade habitual en coidados intensivos. O número de mortos segue tamén en ascenso e os falecidos por coronavirus en Galicia chegan xa aos 808. Do total 350 vivían en residencias de maiores. Na última xornada mellora lixeiramente a situación nestes centros. O número de usuarios contaxiados baixa en dúas ata os 417 mentres que os traballadores que atravesan a enfermidade seguen sendo 142.

Ata a data curáronse en Galicia 22.788 persoas, o que supón 238 máis que as contabilizadas o xoves. E realizáronse 572.690 PCR fronte ás 566.061 contabilizadas ata este xoves. FALECIDOS A Comunidade galega ha rexistrado ata a data o falecemento de 808 persoas con Covid-19, o últimas cinco vítimas foron notificadas este mércores.