MÁIS DE 200 NOVOS ENFERMOS EN GALICIA

A escalada de contaxios na Comunidade galega, que crecía a un ritmo de douscentos positivos ao día, reduciuse no último balance publicado polo departamento de Sanidade. Atendendo ás últimas cifras, o número de casos activos a día de hoxe en Galicia é de 2.580, o que implica 156 máis que na xornada previa. A isto hai que sumar 63 curados nas últimas 24 horas, o que fan un total de 219 novos diagnosticados. Dos 2.580 casos activos, 1.240 corresponden á área da Coruña e Cee (catro máis que este luns); 352 á de Lugo (31 máis); 329 á de Santiago (55 máis) 170 á de Vigo (15 máis), 147 á de Pontevedra e O Salnés (seis máis); 224 á de Ourense (12 máis); e 118 á de Ferrol (cinco máis). Do total de pacientes positivos, 13 están nas unidades de críticos, 73 en unidades de hospitalización e 2.494 pasan a enfermidade no seu domicilio e baixo supervisión médica. Polo momento, en Galicia rexistráronse un total de 12.019 persoas curadas e 633 falecementos. O número de PCR realizadas segue crecendo, ata as 308.162.