DOUS FALECIDOS E OS ENFERMOS NON PARAN DE SUBIR DE FORMA ESCANDALOSA

O coronavirus dispárase definitivamente en Galicia. Con 1.995 casos activos consignados no último parte da Consellería de Sanidade, a Comunidade rexistra un salto de 212 (máis 36 altas e dous falecidos que hai que sumar, 250 enfermos máis) con respecto á véspera, cando xa imprimira un acelerón de 160. En apenas 48 horas, máis de 370 casos no diferencial. Ademais, o número de falecementos chega a 628, tras perder a vida por Covid dous homes na área sanitaria de Lugo, con 93 e 77 anos, respectivamente, e patoloxías previas. Un deles era residente no centro de maiores do Incio onde se declarou un brote que este xoves deixaba case 60 anciáns infectados, ademais de oito traballadores, á espera de que Política Social actualice estes datos. Por áreas sanitarias, A Coruña chega xa a 1.114 casos activos (+69); Lugo, 254 (+84); Ourense, 179 (+32); Pontevedra, 85 (+5); Vigo, 144 (+3); Santiago, 130 (+17); e Ferrol, 89 (+12). Seguen en seis os pacientes en UCI e en planta hospitalaria pasan de 64 a 67 (tres máis). As persoas curadas chegan a 11.737, 36 máis que a véspera.